Retail inflation: స్థిరంగా రిటైల్‌ ద్రవ్యోల్బణం.. ఫిబ్రవరిలో 5.09%

దిల్లీ: వినియోగదారు ధరల సూచీ (CPI) ఆధారిత రిటైల్‌ ద్రవ్యోల్బణం (Retail inflation) ఫిబ్రవరి నెలలో 5.09 శాతంగా నమోదైంది. అంతకుముందు నెలలో 5.1 శాతంగా నమోదైంది. అంటే రిటైల్‌ ద్రవ్యోల్బణంలో పెద్దగా మార్పు లేదు. 2023 ఫిబ్రవరి నెలలో రిటైల్‌ ద్రవ్యోల్బణం 6.44 శాతంగా ఉందని కేంద్ర గణాంక కార్యాలయం (NSO) ప్రకటించింది.  ఈ ఏడాది జనవరిలో 8.3 శాతంగా ఉన్న ఆహార ద్రవ్యోల్బణం ఫిబ్రవరిలో 8.66 శాతానికి చేరింది. ప్రస్తుతం ఆర్థిక సంవత్సరం (2023-24)లో రిటైల్‌ ద్రవ్యోల్బణం 5.4 శాతంగా నమోదు కావొచ్చని రిజర్వ్‌ బ్యాంకు ఆఫ్‌ ఇండియా గత నెలలో అంచనా వేసింది. రిటైల్‌ ద్రవ్యోల్బణాన్ని 2-6 శాతం మధ్య ఉంచే బాధ్యతను ప్రభుత్వం ఆర్‌బీఐకి అప్పగించిన సంగతి తెలిసిందే. దీంతో పరిస్థితులను బట్టి ఆర్‌బీఐ రెపో రేటును పెంచుతూ వచ్చింది.