హెచ్‌పీసీఎల్‌ 2 షేర్లకు 1 షేరు బోనస్‌

25% తగ్గిన నికర లాభం
తుది డివిడెండ్‌ రూ.16.50

దిల్లీ: హెచ్‌పీసీఎల్‌ గత ఆర్థిక సంవత్సరం మార్చి త్రైమాసికంలో రూ.2,709.31 కోట్ల ఏకీకృత నికర లాభాన్ని నమోదు చేసింది. 2022-23 ఇదే కాల లాభం         రూ.3,608.32 కోట్లతో పోలిస్తే ఇది 25% తక్కువ. ఇదే సమయంలో టర్నోవర్‌ మాత్రం రూ.1.15 లక్షల కోట్ల నుంచి రూ.1.22 లక్షల కోట్లకు పెరిగింది. ప్రతి బ్యారెల్‌ ముడి చమురును ఇంధనంగా మార్చడం ద్వారా 6.95 డాలర్ల ఆదాయం ఆర్జించింది. 2022-23 మార్చి త్రైమాసికంలో ఇది 14.01 డాలర్లు, 2023-24 డిసెంబరు త్రైమాసికంలో 8.50 డాలర్లుగా ఉంది. అంతర్జాతీయంగా ముడిచమురు ధరలు పెరిగినా, పెట్రోల్‌, డీజిల్‌ రిటైల్‌ ధరలను లీటరుకు రూ.2 తగ్గించడం వల్ల నికర లాభం తగ్గిందని కంపెనీ తెలిపింది.

• హెచ్‌పీసీఎల్‌ ప్రతి 2 షేర్లకు 1 షేరు బోనస్‌ (1:2 నిష్పత్తిలో) ప్రకటించింది. దీనికి బోర్డు ఆమోదం తెలిపింది. వాటాదార్ల అనుమతి పొందాల్సి ఉంది.
• 2023-24 పూర్తి ఆర్థిక సంవత్సరానికి రూ.16,014.61 కోట్ల నికర లాభాన్ని సంస్థ ఆర్జించింది. 2022-23లో రూ.6,980.23 కోట్ల నికర నష్టాన్ని నమోదు చేసిన సంగతి విదితమే. కార్యకలాపాల ఆదాయం రూ.4,66,192 కోట్ల నుంచి రూ.4,61,638 కోట్లకు తగ్గింది. సగటు స్థూల రిఫైనింగ్‌ మార్జిన్‌ (జీఆర్‌ఎం) 12.09 డాలర్ల నుంచి 9.08 డాలర్లకు తగ్గింది.
• రూ.10 ముఖ విలువ కలిగిన ఒక్కో ఈక్విటీ షేరుకు రూ.16.50 (బోనస్‌కు ముందు), రూ.11 (బోనస్‌ తర్వాత) తుది డివిడెండ్‌ చెల్లించేందుకు కంపెనీ బోర్డు ప్రతిపాదించింది.