పాఠశాలలో కత్తితో హల్‌చల్‌

తుకారాంను అదుపులోకి తీసుకుంటున్న పోలీసులు

బోథ్‌, న్యూస్‌టుడే : ఓ వ్యక్తి కత్తితో పాఠశాలలో హల్‌చల్‌ చేసిన ఘటన బోథ్‌లో ఆలస్యంగా వెలుగులోకి వచ్చింది. స్థానికుల వివరాల ప్రకారం.. బోథ్‌లోని బాలికల ప్రాథమిక పాఠశాలలో సుభాష్‌ మధ్యాహ్న భోజన కార్మికుడిగా పని చేస్తున్నాడు. అతడి తండ్రి తుకారాం సోమవారం పాఠశాలలోకి కత్తి పట్టుకొచ్చి హల్‌చల్‌ చేశాడు. భయాందోళనలకు గురైన ప్రధానోపాధ్యాయురాలు, ఉపాధ్యాయులు పోలీసు సిబ్బందికి సమాచారం అందించారు. సుభాష్‌ తల్లిదండ్రులు మాట్లాడుతూ కొన్ని రోజులుగా కుమారుడి ఆరోగ్యం సరిగా లేకపోవడంతో వేరే కార్మికులతో వంట చేయిస్తున్నామన్నారు. బియ్యం ప్రభుత్వం సరఫరా చేయగా మిగతా వస్తువులన్నీ తామే కొనిచ్చి వంట చేయిస్తున్నాం. ఎన్నిసార్లు అడిగినా ప్రధానోపాధ్యాయురాలు బిల్లులు చెల్లించటం లేదన్నారు. రూ.20,000 వరకు రావాలని ఆగ్రహం వ్యక్తం చేశారు. ప్రధానోపాధ్యాయురాలు అజ్గరున్నీసాను వివరణ కోరగా ఈ విషయంతో తనకు సంబంధం లేదన్నారు. మధ్యాహ్న భోజన బిల్లులు వారి ఖాతాలోనే జమ అవుతాయన్నారు.