కళ్లెదుటే కన్నకూతురి దుర్మరణం

పటాన్‌చెరు అర్బన్‌: బైకును ఓ వాహనం ఢీకొన్న ఘటనలో కన్న తండ్రి కళ్లెదుటే కుమార్తె దుర్మరణం పాలైంది. పటాన్‌చెరు ఎస్సై ప్రసాదరావు వివరాల ప్రకారం రామచంద్రాపురం ఎంఐజీకి చెందిన జాఫర్‌ డ్రైవర్‌. ఇతనికి ముగ్గురు కుమార్తెలు, ఒక కుమారుడు ఉన్నారు. పెద్ద కుమార్తె రేష్మాబేగమ్‌ (17) ఆర్థిక ఇబ్బందులతో ఇంటర్‌ చదువు మధ్యలోనే ఆపేసింది. కొంతకాలంగా సైనస్‌తో ఇబ్బంది పడుతోంది. సంగారెడ్డిలో ఉన్న ఈఎన్‌టీ ఆసుపత్రిలో చూపించుకునేందుకు తండ్రి జాఫర్‌తో కలిసి గురువారం ద్విచక్ర వాహనంపై వెళ్తోంది. ముత్తంగి చర్చి సమీపంలో గుర్తు తెలియని వాహనం బలంగా ఢీకొంది. రేష్మాబేగమ్‌ తీవ్రంగా గాయపడి తండ్రి కళ్ల ముందే దుర్మరణం పాలైంది. జాఫర్‌కు కూడా తీవ్ర గాయాలయ్యాయి. పటాన్‌చెరు పోలీసులు కేసు నమోదు చేసి దర్యాప్తు చేస్తున్నారు.