Bigg boss telugu 7: ‘మేము ఇలా ఉన్నామంటే మీరూ, చిరంజీవిగారే కారణం’: శివాజీ సతీమణి

హైదరాబాద్‌: తమ కుటుంబం ఈ స్థాయిలో ఉందంటే అందుకు నాగార్జున, చిరంజీవిలే కారణమని నటుడు శివాజీ (actor shivaji) సతీమణి శ్వేత అన్నారు. బిగ్‌బాస్‌ సీజన్‌-7లో (Bigg boss telugu 7) శివాజీ కంటెస్టెంట్‌గా ఉన్నసంగతి తెలిసిందే. దీపావళి సందర్భంగా హౌస్‌మేట్స్‌కు సంబంధించిన కుటుంబ సభ్యులు, స్నేహితులు బిగ్‌బాస్‌ వేదికపైకి వచ్చి సందడి చేశారు. హౌస్‌లో ఉన్న వాళ్లతో మాట్లాడారు. టాప్‌-5లో ఎవరెవరు ఉంటారో తమ అభిప్రాయాన్ని చెప్పారు. ఈ సందర్భంగా శివాజీ సతీమణి శ్వేత, ఆయన రెండో కుమారుడు రిక్కీలు వేదికపైకి వచ్చి మాట్లాడారు.

ఈ సందర్భంగా శివాజీ ఎలా ఆడుతున్నాడు? అని నాగార్జున అడగ్గా, ‘ఇంత బాగా ఆడతాడని అస్సలు ఊహించలేదు. . చేయి నొప్పి ఉన్నా మీ సహకారం వల్ల కోలుకున్నాడు. ఫోన్‌లో కూడా మాట్లాడకుండా ఇన్ని రోజులు ఎప్పుడూ ఉండలేదు’ అని శ్వేత సమాధానం ఇచ్చారు. ‘మొదటిసారి నా ఫ్యామిలీ ప్రపంచానికి పరిచయం అయింది. నా వైఫ్‌ పెద్దగా ఎవరికీ తెలియదు. అది కూడా అన్నపూర్ణ స్టూడియోలో ఆమె పరిచయం కావడం సంతోషంగా ఉంది’ అని శివాజీ అన్నారు. ‘మేము ఇలా ఉన్నామంటే మీరు (నాగార్జున) చిరంజీవిగారే కారణం. అది ఇంకా గుర్తుంది..’ అంటూ శ్వేత భావోద్వేగానికి గురవుతూ ఏదో చెప్పబోగా, ‘అమ్మా.. నేనొక మాట చెబుతా.. నేను, చిరంజీవిగారు కాదు.. మీ ఆయన టాలెంట్‌’ అంటూ నాగార్జున (Nagarjuna) అన్నారు. ‘బాబుగారు మీ గురించి వీళ్లెవరికీ తెలియదండీ. మీరు ఇండస్ట్రీకి వచ్చిన ఓ పదేళ్లకు నేను వచ్చాను. కానీ, మీరెంత మందిని సపోర్ట్‌ చేసి, ఇండస్ట్రీకి పరిచయం చేశారో నా కళ్లతో చూశా. కుటుంబ నేపథ్యం ఉండొచ్చు కానీ, మంచితనం ఉండటం చాలా అరుదు. మీరు పెట్టిన భిక్ష ఇది. ఎంతమందికి అన్నం పెట్టారో. మాలాంటి వాళ్లందరూ మీకు రుణపడి ఉన్నారు’’ అని శివాజీ అన్నారు.

‘నువ్వు ప్రేక్షకుల మనసు గెలుచుకుందామని అక్కడకు వెళ్లావు. అది జరిగింది. చిన్న చిన్న విషయాలకు ఎక్కువ ఆవేశ పడకు. నీ పాయింట్‌పై నిలబడు. నీ వెనుక జనం నిలబడతారు. మిమ్మల్ని అత్యున్నత శిఖరాల్లో చూడాలనుకుంటున్నా. నువ్వు ఎంత పెద్ద హీరోవో నాకు తెలియదు. కానీ, ఇప్పుడు ప్రతి ఇంట్లో ఒక శివన్న ఉన్నాడు. అందరినీ గెలుచుకుని రా’ అని శివాజీ కొడుకు రీక్కీ అన్నాడు. ఇక టాప్‌-5 కంటెస్టెంట్‌లుగా శివాజీ, పల్లవి ప్రశాంత్‌, యావర్‌, అమర్‌దీప్‌, ప్రియాంకలు ఉంటారని శివాజీ ఫ్యామిలీ చెప్పింది.

బిగ్‌బాస్‌ సీజన్‌-7 నుంచి భోలే షావలి ఔట్‌

బిగ్‌బాస్‌ సీజన్‌-7 నుంచి సంగీత దర్శకుడు భోలే షావలి (bhole shavali) ఎలిమినేట్‌ అయ్యారు. ఈ వారం నామినేషన్స్‌లో భోలే షావలి, గౌతమ్‌ కృష్ణ, శివాజీ, ప్రిన్స్‌ యావర్‌, రతికలు ఉండగా, అతి తక్కువ ఓట్లు వచ్చిన భోలే షావలి ఎలిమినేట్‌ అయినట్లు నాగార్జున ప్రకటించారు. ఈ సందర్భంగా వేదికపై పాట పాడి, బిగ్‌బాస్‌ గేమ్‌ను భోలే షావలి నిష్క్రమించారు.