Cinema news: మొదట నేనే గుర్తొచ్చానా..?

ఇంటర్నెట్‌ డెస్క్‌: వయసు పెరిగే కొద్దీ యువ్వనంగా కనిపించే హీరోల్లో నటుడు సిద్ధార్థ్‌ ముందు వరుసలో ఉంటారు. నాలుగుపదుల వయసులోనూ పాతికేళ్ల కుర్రాడిలా కనిపిస్తారు. అయితే.. తన వయసు గురించి ఓ నెటిజన్‌ చేసిన వ్యాఖ్యలపై సిద్ధార్థ్‌ ఘాటుగా స్పందించారు. హీరోల వయసు అనగానే మొదట నేనే గుర్తొచ్చానా..? అంటూ మండిపడ్డారు. ఇంతకీ ఏం జరిగిందంటే..  త్వరలో విడుదల కానున్న సినిమాలో వయసులో సగంకంటే తక్కువ వయసున్న హీరోయిన్‌తో నటించాడంటూ ట్విటర్‌లో చర్చ మొదలైంది. ఈ క్రమంలో ఓ నెటిజన్‌ స్పందిస్తూ 40 సంవత్సరాల వయసున్న సిద్ధార్థ్‌ 20ఏళ్ల హీరోయిన్‌తో నటించినప్పుడు ఆ హీరో  నటించడంలో తప్పేముంది అని ప్రశ్నించాడు. ఆ ట్వీట్‌లో సిద్ధార్థ్‌ను ట్యాగ్‌ చేశాడు. దీనిపై స్పందించిన నటుడు సిద్ధార్థ్‌ ‘ఈ హీరో వయసు విషయంలో నీకు మొదట నేనే గుర్తొచ్చానా..? ట్యాగ్‌ కూడా చేశావ్‌.? సూపర్‌ దరిద్రమ్‌. ఎక్కడి నుంచి వస్తారయ్యా..? అంటూ ఆగ్రహం వ్యక్తం చేశారు.

‘నువ్వొస్తానంటే నేనొద్దంటానా’ చిత్రంతో నేరుగా తెలుగు ప్రేక్షకులకు దగ్గరయ్యారు. ఆ తర్వాత పలు హిట్‌ సినిమాల్లో నటించారు. తెలుగు, హిందీ, ఇంగ్లిష్‌, తమిళంతో పాటు మలయాళంలోనూ సినిమాలు చేస్తూ వస్తున్నారు. ప్రస్తుతం ‘మహాసముద్రం’ చిత్రంలో నటిస్తున్నారు. తమిళంలో మరో మూడు సినిమాలు చేస్తున్నారు. ‘నవరస’ అనే వెబ్‌సిరీస్‌లోనే కనిపించనున్నారు.