Adah Sharma: కమల్‌ హాసన్ వ్యాఖ్యలపై స్పందించిన అదా శర్మ.. ఏమన్నారంటే..!

హైదరాబాద్‌: అదా శర్మ (Adah Sharma) ప్రధాన పాత్రలో నటించిన చిత్రం ‘ది కేరళ స్టోరీ’ (The Kerala Story). ఎన్నో వివాదాల మధ్య విడుదలైన ఈ చిత్రం సూపర్‌ హిట్‌గా నిలిచి కోట్లు రాబట్టింది. అయితే.. ఈ సినిమా ట్రైలర్‌ వచ్చినప్పటి నుంచే ఎంతోమంది దీనిపై విమర్శలు కురిపించిన సంగతి తెలిసిందే. కమల్‌ హాసన్‌ ( Kamal Haasan), నసీరుద్దీన్‌ షా (Naseeruddin Shah)లు కూడా బహిరంగంగానే విమర్శించారు. తాజాగా వారి వ్యాఖ్యలపై అదా శర్మ స్పందించింది.

ఓ ఇంటర్వ్యూలో ఆమె మాట్లాడుతూ.. ‘‘ది కేరళ స్టోరీ’ని విమర్శించిన వారిలో చాలామంది కనీసం దానిని చూడకుండానే కామెంట్స్‌ చేశారు. ఎన్నో విమర్శలు చేశారు. కానీ నేనేం బాధపడలేదు. మనదేశంలో ఉన్న వాక్‌ స్వేచ్ఛకు చాలా సంతోషించాను. ఎవరైనా ఎవరి గురించైనా మాట్లాడవచ్చు. ఇక్కడ భిన్నమైన అభిరుచులు ఉన్న వ్యక్తులు ఉన్నారు. అదే మన దేశంలో ఉండే అద్భుతమైన విషయం. నేను నా దేశాన్ని ప్రేమిస్తున్నాను’’ అని చెప్పింది.

• ఇదీ చదవండి: అందుకే నటనకు దూరం కావాల్సి వచ్చింది: ‘సింహాద్రి’ హీరోయిన్‌

కాగా గతంలో కమల్‌ హాసన్‌ ‘ది కేరళ స్టోరీ’ (The Kerala Story)గురించి మాట్లాడుతూ తనకు ప్రచార చిత్రాలంటే నచ్చవని అన్నారు. అలాంటి వాటికి తాను పూర్తిగా వ్యతిరేకినని చెప్పారు. సినిమా టైటిల్‌ కింద ‘నిజమైన కథ’ అని రాయగానే సరిపోదని.. అలా రాసినంత మాత్రాన అది నిజంగా జరిగిన కథ అవ్వదని ఆయన తన అభిప్రాయాన్ని తెలిపారు. ఈ సినిమా విడుదల సమయంలో కమల్‌ వ్యాఖ్యలు తీవ్ర దుమారం రేపిన విషయం తెలిసిందే.