Anushka: మరో భాషలో విడుదలకు సిద్ధమైన ‘మిస్‌ శెట్టి.. మిస్టర్‌ పొలిశెట్టి’

హైదరాబాద్‌: తాజాగా విడుదలై విజయాన్ని సొంతం చేసుకున్న చిత్రం ‘మిస్‌ శెట్టి.. మిస్టర్‌ పొలిశెట్టి’ (Miss Shetty Mr Polishetty). అనుష్క (Anushka), నవీన పొలిశెట్టి (Naveen Polishetty) జంటగా నటించిన ఈ సినిమా థియేటర్లో నవ్వులు పూయిస్తోంది. ఇప్పుడీ చిత్రం మలయాళ ప్రేక్షకులను కూడా అలరించడానికి సిద్ధమైంది. ఈ విషయాన్ని తెలుపుతూ నిర్మాణ సంస్థ ట్వీట్‌ చేసింది. రేపు (సెప్టెంబర్‌ 15) ఈ సినిమాను మలయాళంలో విడుదల చేయనున్నట్లు తెలిపింది. దీనికి సంబంధించిన టికెట్ల బుకింగ్స్‌ను మొదలుపెట్టినట్లు వెల్లడించింది. ఇక మరోవైపు ఈ సినిమా డిజిటల్ స్ట్రీమింగ్‌ రైట్స్‌ను ‘నెట్‌ఫ్లిక్స్‌’ దక్కించుకుంది. అలాగే శాటిలైట్‌ హక్కులను ‘జీ’ టీవీ సొంతం చేసుకుంది. 

సాయి పల్లవి బాలీవుడ్‌ ఎంట్రీ.. ఆ స్టార్‌ హీరో తనయుడితో?

ఇక నేడు (సెప్టెంబర్‌ 14) ఈ సినిమాను రెండు తెలుగు రాష్ట్రాల్లోని ఎంపిక చేసిన థియేటర్లలో మహిళల కోసం ప్రత్యేకంగా ప్రదర్శించనున్నారు. ఈ సందర్భంగా చిత్రబృందం మహిళా ఆడియన్స్ కోసం ఓ ఆఫర్‌ను ప్రకటించింది.  ‘ఈ సినిమా టికెట్‌ పై ఫోన్‌ నంబర్‌ రాసి థియేటర్లో ఏర్పాటు చేసిన బాక్స్‌లో వేయండి. ప్రతి థియేటర్‌ నుంచి ఎంపిక చేసిన ఇద్దరు లేడీ ఫ్యాన్స్‌కు అనుష్క ఫోన్‌ చేసి మాట్లాడతారు’ అని మేకర్స్‌ తెలిపారు. అయితే, ఈ ఆఫర్‌ కేవలం సెప్టెంబర్‌ 14న మాత్రమే ఉంటుందన్నారు.