Butta Bomma: ‘బుట్టబొమ్మ’ ఓటీటీలోకి వస్తోంది.. స్ట్రీమింగ్‌ ఎప్పుడంటే?

ఇంటర్నెట్‌ డెస్క్‌: అర్జున్‌ దాస్‌, సూర్య వశిష్ఠ, అనిఖా సురేంద్రన్‌ ప్రధాన పాత్రల్లో తెరకెక్కిన ‘బుట్టబొమ్మ’ (Butta Bomma) సినిమా ఓటీటీలోకి వచ్చేస్తోంది. మార్చి 4న నుంచి ‘నెట్‌ఫ్లిక్స్‌’ (Netflix)లో స్ట్రీమింగ్‌ కానుంది. తమ ఓటీటీలో ‘త్వరలో రాబోతున్న సినిమాల జాబితా’లో నెట్‌ఫ్లిక్స్‌ ఆ వివరాలను పొందుపరిచింది. శౌరి చంద్రశేఖర్‌, టి. రమేశ్‌ దర్శకత్వం వహించిన ఈ సినిమా ఫిబ్రవరి 4న థియేటర్లలో విడుదలైన సంగతి తెలిసిందే. మలయాళ సినిమా ‘కప్పేల’కు రీమేక్‌గా రూపొందిన ‘బుట్టబొమ్మ’ ఆశించిన ఫలితాన్ని అందుకోలేకపోయింది.

కథేంటంటే: అరకు ప్రకృతి అందాల మధ్య ఉన్న దూది కొండకు చెందిన ఓ మామూలు మధ్యతరగతి అమ్మాయి సత్య (అనిఖా సురేంద్రన్‌). ఆమెది చాలా సింపుల్‌ లైఫ్‌. టైలరింగ్‌ చేసుకునే తల్లి, రైసు మిల్లులో పని చేసే తండ్రి, స్కూల్‌కు వెళ్లే ఓ చెల్లి, ఇష్టంగా పూజించే కృష్ణుడు.. ఆమె జీవితంలో కనిపించే ముఖ్యమైన వ్యక్తులు వీళ్లే. ఓ కెమెరా ఫోన్‌ కొనుక్కుని.. రీల్స్‌ చేసి ఫేమస్‌ అవ్వాలన్నది ఆమె కల. కానీ, ఓ రాంగ్‌ నంబర్‌ సత్య జీవితాన్ని మార్చేస్తుంది. కనీసం ఒక్కసారైనా చూడకుండానే ఫోన్‌లో పరిచయమైన మురళీ (సూర్య వశిష్ఠ)ని ప్రేమిస్తుంది. తన తల్లిదండ్రులు మరో వ్యక్తితో పెళ్లి సంబంధం ఖాయం చేయడంతో.. చెప్పాపెట్టకుండా అతడిని కలవడం కోసం విశాఖపట్నం వెళ్తుంది. కానీ, ఆ తర్వాత ఆమె జీవితం అనూహ్య మలుపులు తిరుగుతుంది. మరి మురళీని కలవడం కోసం వైజాగ్‌ వెళ్లిన సత్యకు ఎలాంటి అనుభవాలు ఎదురయ్యాయి? ఈ జంటను ఆర్కే (అర్జున్‌ దాస్‌) ఫాలో చేయడానికి కారణమేంటి? అతను ఎవరు? చివరికి ఏం చేశాడు? అన్నది మిగతా కథ.