OMG 2: ‘ఆదిపురుష్‌’ ఎఫెక్ట్‌.. అక్షయ్‌ సినిమాకి రివిజన్‌ కమిటీ?

ఇంటర్నెట్‌ డెస్క్‌: బాలీవుడ్‌ హీరో అక్షయ్‌ కుమార్‌ (Akshay Kumar) తాజా చిత్రం ‘ఓ మై గాడ్‌ 2’ (OMG 2) విషయంలో సెన్సార్‌ బోర్డు (Central Board of Film Certification- CBFC) చాలా జాగ్రత్త వహిస్తున్నట్టు తెలుస్తోంది. ఈ మేరకు సినిమాని రివిజన్‌ కమిటీకి పంపించినట్టు బాలీవుడ్‌లో వార్తలొస్తున్నాయి. ఆ కమిటీ ఇచ్చే సూచనల మేరకు విడుదల తేదీలో మార్పు ఉండొచ్చనే టాక్‌ వినిపిస్తోంది. ప్రభాస్‌ హీరోగా దర్శకుడు ఓంరౌత్‌ తెరకెక్కించిన ‘ఆదిపురుష్‌’ (Adipurush), అదాశర్మ ప్రధాన పాత్రల్లో సుదీప్తో సేన్‌ తెరకెక్కించిన ‘ది కేరళ స్టోరీ’ (The Kerala Story) తదితర సినిమాల విషయంలో సెన్సార్‌ బోర్డుపై విమర్శలు వెల్లువెత్తిన సంగతి తెలిసిందే. ఆయా సినిమాల్లో పలు అభ్యంతర సన్నివేశాలు/ సంభాషణలు ఉన్నాయని, వాటి విషయంలో సెన్సార్‌ బోర్డు ఎలాంటి చర్యలు తీసుకోలేదనే వాదనలు గట్టిగా వినిపించాయి. దాంతో, ఇతిహాసాలు, మతపరమైన కథాంశాలతో రూపొందిన సినిమాల విషయంలో సెన్సార్‌ బోర్డు ఎంతో జాగ్రత్తగా వ్యవహరిస్తుందట.

• ఇదీ చదవండి: ఏడాది సమయమిచ్చారు.. ఇండస్ట్రీ పేరెత్తకూడదన్నారు: అదితి శంకర్‌ జర్నీ

‘ఓ మై గాడ్‌ 2’.. దైవానికి సంబంధించిన అంశాలతో రూపొందిన సినిమాకావడంతో ఎలాంటి అభ్యంతరాలకు తావు లేకుండా ఉండాలని సెన్సార్‌ బోర్డు నిర్ణయించుకుని, ఈ మేరకు ఇప్పటికే సినిమాని చూసిన బోర్డు దాన్ని రీవిజన్‌ కమిటీకి పంపించిందని టాక్‌. అయితే, దీనిపై దర్శక, నిర్మాతలు స్పందించలేదు. అమిత్‌ రాయ్‌ దర్శకత్వం వహించిన ఈ సినిమాలో అక్షయ్‌.. శివుడి పాత్ర పోషించారు. యామీ గౌతమి కథానాయికగా నటించగా పంకజ్‌ త్రిపాఠి, అరుణ్‌ గోవిల్‌ తదితరులు కీలక పాత్రలు పోషించారు. 2012లో విడుదలై, మంచి విజయాన్ని అందుకున్న ‘ఓ మై గాడ్‌’కి సీక్వెల్‌గా రూపొందిన ఈ సినిమాని ఆగస్టు 11న విడుదల చేస్తున్నట్టు మేకర్స్‌ ఇటీవల సోషల్‌ మీడియా వేదికగా ప్రకటించారు.