NTR: టాలీవుడ్‌లో ఫ్యాన్స్ వార్.. ఎన్టీఆర్‌పై హెచ్‌సీఏ ఆసక్తికర ట్వీట్

ఇంటర్నెట్‌డెస్క్‌: సోషల్‌మీడియా వేదికగా టాలీవుడ్‌ (Tollywood) సినీ ప్రియుల మధ్య ఎంతో కాలం నుంచి కోల్డ్‌ వార్‌ జరుగుతోన్న విషయం తెలిసిందే. హాలీవుడ్‌ క్రిటిక్స్‌ అసోసియేషన్‌ (హెచ్‌సీఏ) (HCA) అవార్డుల ప్రదానోత్సవంతో ఇప్పుడిది మరింత ఎక్కువైంది. ఈ క్రమంలోనే హెచ్‌సీఏకు మద్దతుగా.. ఎన్టీఆర్‌ అభిమానులను విమర్శిస్తూ ఓ నెటిజన్‌ ట్వీట్‌ చేశాడు. దానిపై స్పందించిన హెచ్‌సీఏ బృందం తనదైన శైలిలో రిప్లై ఇచ్చింది. ఎన్టీఆర్‌కు అవార్డులు కొత్తేమీ కాదని చెప్పింది.

‘ఆర్‌ఆర్‌ఆర్‌’ (RRR) చిత్రానికి గానూ ఎన్టీఆర్‌ (NTR), అలియా భట్‌(Alia Bhatt)కు వచ్చేవారం ‘హెచ్‌సీఏ’ అవార్డులను పంపిస్తున్నామని తెలియజేస్తూ శుక్రవారం ఉదయం సదరు అవార్డు బృందం ఓ ట్వీట్‌ చేసింది. నటీనటుల పేర్లతో ఉన్న ట్రోఫీల ఫొటోలను షేర్‌ చేసింది. దీనిపై ఓ నెటిజన్‌ స్పందిస్తూ.. ‘‘ఒక భారతీయ చిత్రానికి హెచ్‌సీఏ అవార్డులు ఇవ్వడం ఇదే ఆఖరిసారి కావొచ్చు. ఎందుకంటే, కొంతమంది అభిమానులు అనవసరంగా బెదిరింపులకు పాల్పడుతున్నారు. భవిష్యత్తులో ఎన్టీఆర్‌కు మరెన్నో అవార్డులు రావాలి’’ అని ట్వీట్‌ చేశాడు. దీనిపై హెచ్‌సీఏ బృందం స్పందిస్తూ.. ‘‘ఆయనకు ఎప్పుడూ అవార్డులు వస్తూనే ఉంటాయి. కాకపోతే, ఆయన వ్యక్తిగతంగా వచ్చి వాటిని అందుకోలేకపోయారు.’’ అని వివరణ ఇచ్చింది.

హాలీవుడ్‌లో ప్రతిష్ఠాత్మకంగా భావించే అవార్డుల్లో హాలీవుడ్‌ క్రిటిక్స్‌ అసోసియేషన్‌ అవార్డు ఒకటి. ఇటీవల ఈ అవార్డుల ప్రదానోత్సవం కాలిఫోర్నియాలో వేడుకగా జరిగింది. ‘బెస్ట్‌ స్టంట్స్‌’, ‘బెస్ట్‌ యాక్షన్‌ మూవీ’, ‘బెస్ట్‌ ఒరిజినల్‌ సాంగ్‌’, ‘బెస్ట్‌ ఇంటర్నేషనల్‌ ఫిల్మ్‌’ కేటగిరిలతోపాటు ‘హెచ్‌సీఏ’ స్పాట్‌లైట్‌ అవార్డును సైతం ‘ఆర్‌ఆర్ఆర్‌’ (RRR) దక్కించుకుంది. రామ్‌చరణ్‌ (Ram Charan) ఒక్కడే ఈ కార్యక్రమానికి హాజరు కావడం పై పలువురు నెటిజన్లు అసహనం వ్యక్తం చేశారు. ‘ఎన్టీఆర్‌ని ఆహ్వానించలేదా?’ అంటూ హెచ్‌సీఏ టీమ్‌కు ట్వీట్స్‌ చేయగా.. ఆయన్ని ఆహ్వానించామని, కొత్త సినిమా షూట్‌లో బిజీగా ఉండటం వల్ల హాజరు కాలేదని రిప్లై ఇచ్చింది.