Naga Chaitanya: చైల్డ్‌కేర్‌ సెంటర్‌లో నాగ చైతన్య సందడి.. ఫొటోలు చూశారా!

ఇంటర్నెట్‌ డెస్క్‌: టాలీవుడ్‌ హీరో నాగ చైతన్య (Naga Chaitanya) హైదరాబాద్‌లోని సెయింట్‌ జూడ్స్‌ చైల్డ్‌కేర్‌ సెంటర్‌లో సందడి చేశారు. క్యాన్సర్‌తో పోరాడుతున్న అక్కడి చిన్నారులతో సరదాగా గడిపారు. బాలల దినోత్సవం సందర్భంగా ఆ కేంద్రాన్ని సందర్శించిన ఆయన ఆ చిన్నారులకు బహుమతులు అందించారు. వారితో కాసేపు సరదాగా ఆటలు ఆడారు. డ్యాన్స్‌ చేసి వారిని ఉల్లాసపరిచారు. సంబంధిత ఫొటోలు తాజాగా బయటకు వచ్చాయి. వాటిలో నాగ చైతన్య.. ఓ చిన్నారి ఏదో చెబుతుంటే శ్రద్ధగా వింటూ, మ్యూజికల్‌ ఛైర్‌ గేమ్‌ ఆడుతూ కనిపించారు.

‘ప్రభాస్‌ మీపై కోప్పడ్డారా?’: ప్రభాస్‌ శ్రీను ఏమన్నారంటే?

ఈ ఏడాది ‘కస్టడీ’తో ప్రేక్షకులను పలకరించిన నాగ చైతన్య.. చందూ మొండేటి దర్శకత్వంలో ఓ సినిమా ఖరారు చేశారు. ప్రస్తుతం ప్రీ ప్రొడక్షన్‌ పనులు జరుగుతున్నాయి. మత్స్యకారుల జీవితాలను అద్దం పట్టే ఓ యథార్థ కథాంశంతో ఈ చిత్రం తెరకెక్కనుంది. ఈ సినిమా కోసం శరీరాకృతిని పూర్తిగా మార్చుకుంటున్నారు చైతన్య. ఇందులో సాయి పల్లవి కథానాయిక. మరోవైపు, నాగ చైతన్య నటించిన తొలి వెబ్‌సిరీస్‌ ‘దూత’ విడుదలకు సిద్ధంగా ఉంది. విక్రమ్‌ కె. కుమార్‌ దర్శకత్వం వహించిన ఈ సిరీస్‌ ప్రముఖ ఓటీటీ అమెజాన్‌ ప్రైమ్‌లో డిసెంబరు 1 నుంచి స్ట్రీమింగ్‌ కానుంది.