Kangana Ranaut: కంగనా రనౌత్‌ను సర్‌ప్రైజ్‌ చేసిన రజనీకాంత్‌..

ఇంటర్నెట్‌ డెస్క్‌: ఆర్‌.మాధవన్-కంగనా రనౌత్‌లు ఎనిమిదేళ్ల తర్వాత మళ్లీ కలిసి నటించనున్నారు. ‘తను వెడ్స్‌ మను’తో అలరించిన ఈ జోడి ఇప్పుడు మరోసారి స్క్రీన్‌పై కనిపించనుంది. ఈసారి ఓ సైకలాజికల్‌ థ్రిల్లర్‌తో భయపెట్టడానికి వీళ్లిద్దరూ సిద్ధమయ్యారు. ఈ విషయాన్ని తెలుపుతూ కంగనా పోస్ట్‌ చేశారు. ఓ సరికొత్త కథాంశంతో రానున్న తమిళ చిత్రంలో మాధవన్‌తో కలిసి తాను నటించనున్నట్లు చెప్పారు. విజయ్‌ దర్శకత్వంలో ఇది తెరకెక్కనున్నట్లు తెలిపారు. ఈ చిత్రం నేడు పూజా కార్యక్రమాలతో మొదలైందన్నారు. దానికి సంబంధించిన ఫొటోలను పంచుకున్నారు. త్వరలోనే దీనికి సంబంధించిన పూర్తి వివరాలను వెల్లడించనున్నారు.

ఇక ఈ సెట్స్‌కు రజనీకాంత్ వచ్చి తనను సర్‌ప్రైజ్‌ చేసినట్లు కంగనా రనౌత్ చెప్పారు. ‘భారతీయ సినిమా దేవుడిగా చెప్పే తలైవా మా సెట్స్‌కు రావడం ఎంతో ఆనందంగా ఉంది. త్వరలోనే మాధవన్‌ కూడా ఈ షూటింగ్‌లో భాగం కానున్నారు’ అంటూ రజనీతో దిగిన ఫొటోలను షేర్‌ చేశారు. ఇక మరోవైపు కంగనా రనౌత్‌  స్వీయ దర్శకత్వంలో ‘ఎమర్జెన్సీ’ (Emergency) రూపుదిద్దుకుంటోంది. ఈ చిత్రం వచ్చే ఏడాది ప్రేక్షకుల ముందుకు రానుంది. స్వతంత్ర భారతదేశంలో చీకటి రోజులుగా పిలిచే ఎమర్జెన్సీ నాటి పరిస్థితుల్ని ఆధారంగా దీన్ని తెరకెక్కిస్తున్నారు. ఇందులో కంగన.. ఇందిరా గాంధీ పాత్రలో కనిపించనున్నారు.