Nene Naa Movie ott: ఓటీటీలోకి వచ్చేసిన రెజీనా మిస్టరీ థ్రిల్లర్‌.. స్ట్రీమింగ్‌ ఎక్కడంటే?

హైదరాబాద్‌: వైవిధ్యభరిత కథలతో ప్రయోగాలు చేస్తూ.. ఎప్పటికప్పుడు సరికొత్తగా ప్రేక్షకుల్ని అలరిస్తోంది నటి రెజీనా (Regina Cassandra). ఇటీవల ఆమె ప్రధాన పాత్రలో నటించిన చిత్రం ‘నేనే నా’ (Nene Naa). కార్తీక్‌ రాజు తెరకెక్కించారు. రాజ్‌శేఖర్‌ వర్మ నిర్మాత. తెలుగు, తమిళ భాషల్లో ఏక కాలంలో విడుదలైన ఈ సినిమా బాక్సాఫీస్‌ వద్ద పెద్దగా మెప్పించలేకపోయింది. ఇప్పుడు ఓటీటీ వేదికగా స్ట్రీమింగ్‌ అవుతోంది. ప్రముఖ తెలుగు ఓటీటీ వేదిక ఆహాలో శుక్రవారం నుంచి స్ట్రీమింగ్‌కు వచ్చింది. ‘ఓ మిస్టరీ కథాంశంతో రూపొందిన చిత్రమిది. ఇందులో రెజీనా ఆర్కియాలజిస్ట్‌గా కనిపించింది’

ఆ హత్య వెనుక ఉన్నది ఎవరు?

ఇక ఈ సినిమా కథ విషయానికొస్తే.. ఇందులో యువరాణిగా, ఆర్కియాలజిస్టుగా ద్విపాత్రాభినయం చేశారు రెజీనా. అడవిలో అనుమానాస్పదంగా చనిపోయిన ఓ విదేశీయుడి హత్య కేసులో పోలీసులు ఆర్కియాలజిస్ట్‌ దివ్య (రెజీనా) సహాయం తీసుకుంటారు. అయితే ఆ హత్య చేసింది దివ్య రూపంలోనే ఉన్న దమయంతి (రెజీనా) అని పోలీసుల విచారణలో తేలుతుంది. మరి ఆర్కియాలజిస్టు దివ్యకు, గత జన్మలో యువరాణి అయిన దమయంతికీ మధ్య సంబంధం ఏంటి? ఆ హత్య చేసింది ఎవరు? తెలియాలంటే సినిమా చూడాల్సిందే!