Ustaad: ఓటీటీలోకి ‘ఉస్తాద్‌’.. స్ట్రీమింగ్‌ ఎక్కడంటే?

హైదరాబాద్‌: శ్రీ సింహా కోడూరి  (sri simha koduri) నటించిన తాజా చిత్రం ‘ఉస్తాద్‌’ (Ustaad). ఇటీవల ప్రేక్షకుల ముందుకు వచ్చిన ఈ సినిమా మిశ్రమ స్పందనలకే పరిమితమైంది. ఫణిదీప్‌ దర్శకత్వం వహించిన ఇందులో కావ్యా క‌ళ్యాణ్ రామ్‌ హీరోయిన్‌గా నటించింది. ఆగస్టు 12న విడుదలైన ఈ చిత్రం డిజిటల్‌ ప్రేక్షకులను అలరించేందుకు OTTలోకి వచ్చేసింది. ‘అమెజాన్‌ ప్రైమ్‌ వీడియో’ (Amazon Prime Video) వేదికగా స్ట్రీమింగ్‌ అవుతోంది. అకీవా.బి సంగీతం అందించిన ఈ చిత్రంలో గౌత‌మ్ వాసుదేవ్ మీన‌న్‌, అను హాస‌న్‌, ర‌వీంద్ర విజ‌య్‌, తదితరులు నటించారు. 

 ‘జైలర్‌’ హవా.. రజనీకాంత్‌కు డబుల్‌ సర్‌ప్రైజ్‌.. వీడియో వైరల్‌

క‌థేంటంటే: మ‌న‌సుకు న‌చ్చింది చేసుకుంటూ వెళ్లే కుర్రాడు సూర్య‌ (శ్రీసింహా). చిన్న‌ప్పుడే తండ్రి మ‌ర‌ణించ‌డంతో.. త‌ల్లే (అను హాస‌న్‌) అన్నీ తానై పెంచి పెద్ద చేస్తుంది. సూర్య‌కు ఎత్తైన ప్ర‌దేశాలంటే భ‌యం. అలాగే విప‌రీత‌మైన కోపం. ఏ భావోద్వేగాన్నైనా అప్ప‌టిక‌ప్పుడే చూపించేయ‌డం త‌న నైజం. జీవితంపై ఏ స్ప‌ష్టతా ఉండ‌దు. డిగ్రీ చ‌దివే రోజుల్లో ఓ పాత కాలం నాటి బైక్‌ను ముచ్చ‌ట‌ప‌డి కొనుక్కుంటాడు. దానికి ఉస్తాద్ అని పేరు పెట్టుకుంటాడు. అది జీవితంలోకి వ‌చ్చాక త‌న ఆనందం.. బాధ‌.. క‌ష్టం.. సుఖం.. ప్ర‌తిదీ దానితోనే పంచుకోవ‌డం మొద‌లు పెడ‌తాడు. ఆ బైక్ వ‌ల్లే మేఘ‌న (కావ్యా క‌ల్యాణ్ రామ్‌) సూర్య జీవితంలోకి వ‌స్తుంది. ఇద్ద‌రూ ప్రేమించుకుంటారు. ఆ త‌ర్వాత సూర్య‌కు పైల‌ట్ అవ్వాల‌న్న ల‌క్ష్యం ఏర్ప‌డుతుంది.  మ‌రి ఎత్తైన ప్ర‌దేశాలంటే భ‌య‌ప‌డే సూర్య పైల‌ట్ అవ్వాల‌న్న త‌న క‌ల‌ను ఎలా నెర‌వేర్చుకున్నాడు? ఈ క్ర‌మంలో త‌న‌కెదురైన స‌వాళ్లేంటి? (ustaad movie on OTT) త‌న వ్య‌క్తిత్వం వ‌ల్ల ప్రేమ‌క‌థ‌లో వ‌చ్చిన చిక్కులేంటి?  వీట‌న్నింటినీ సూర్య ఎలా ప‌రిష్క‌రించుకున్నాడు? ఈ ప్ర‌యాణంలో ఉస్తాద్ అత‌ని జీవితాన్ని ఎలా ప్ర‌భావితం చేసింది? ఈ క‌థ‌లో బైక్ మెకానిక్ బ్ర‌హ్మం (ర‌వీంద్ర విజ‌య్‌), పైల‌ట్‌ జోసెఫ్ డిసౌజా (గౌత‌మ్ మేన‌న్‌) పాత్ర‌ల‌కున్న ప్రాధాన్య‌త ఏంట‌న్న‌ది అమెజాన్‌లో చూసి తెలుసుకోవాలి.