Krishna: కృష్ణ డ్రీమ్‌ ప్రాజెక్టు అందుకే రాలేదు.. అదేంటంటే?

ఇంటర్నెట్‌ డెస్క్‌: తెలుగు చలన చిత్ర పరిశ్రమలో నటుడిగా, దర్శకుడిగా ఎన్నో సాహసాలు చేసిన కృష్ణ (Krishna) తన కలల ప్రాజెక్టును పట్టాలెక్కించలేకపోయారు. విప్లవ వీరుడు అల్లూరి సీతారామరాజు జీవితాధారంగా తెరకెక్కిన ‘అల్లూరి సీతారామరాజు’ సినిమాతో కృష్ణ ఎంతటి సంచలనం సృష్టించారో తెలిసిందే. ఆ తర్వాత ఆయన.. ఛత్రపతి శివాజీ జీవితాధారంగా ఓ చిత్రాన్ని తెరకెక్కించాలనుకున్నారు. దానికోసం ఎన్నో ప్రయత్నాలు చేశారు. స్క్రిప్టు వర్క్‌ కూడా పూర్తయిందట. కానీ, అది పట్టాలెక్కలేదు. పలు కారణాలతో ఈ ప్రాజెక్టును ఆపేశాం’ అని ఓ సందర్భంలో తెలిపారు.

తెలుగు, తమిళ భాషల్లో భారీ తారాగణం, భారీ బడ్జెట్‌తో కృష్ణ ఈ చిత్రాన్ని తీసుకురావాలనుకున్నారు. పూర్తిస్థాయిలో ఛత్రపతి శివాజీగా కనిపించకపోయినప్పటికీ ‘చంద్రహాస్‌’,నంబర్‌-1 అనే సినిమాల్లో చిన్న వేషం వేసి కృష్ణ తన కోరిక నెరవేర్చుకున్నారు. మరోవైపు, మంచి కథ ఉంటే కృష్ణ తన కొడుకు, నటుడు మహేశ్‌బాబు, మనవడు గౌతమ్‌తో కలిసి ఓ చిత్రంలో నటించాలనుకున్నారు. అదీ సాధ్యంకాలేదు. వ్యాఖ్యాతగా వ్యవహరించడం కృష్ణకు బాగా ఇష్టం. హిందీలో విశేష ప్రేక్షకాదరణ పొందిన ‘కౌన్‌ బనేగా కరోడ్‌ పతి’లాంటి షోను తెలుగులో చేసేందుకు ఆసక్తి చూపారట.