Yash: పుట్టినరోజంటేనే భయమేస్తోంది.. అభిమానుల మృతిపై యశ్‌ భావోద్వేగం

ఇంటర్నెట్‌ డెస్క్‌: స్టార్‌ హీరో యశ్‌ (yash) పుట్టినరోజు సందర్భంగా కటౌట్‌లు ఏర్పాటు చేస్తూ కరెంట్‌షాక్‌కు గురై ముగ్గురు అభిమానులు మృతి చెందిన విషయం తెలిసిందే. వారి కుటుంబాలను యశ్‌ ఓదార్చారు. అనంతరం మీడియాతో మాట్లాడుతూ ఆయన భావోద్వేగానికి గురయ్యారు.

‘రాష్ట్రంలో మళ్లీ కోవిడ్‌ కేసులు పెరుగుతున్నాయని వార్తలు వస్తుండటంతో నేను ఈసారి పుట్టినరోజు వేడుకలను చేసుకోకూడదని నిర్ణయించుకున్నా. ఇదే విషయాన్ని నాలుగురోజుల ముందే నా అభిమానులకు తెలియజేశాను. నన్ను కలిసేందుకు ఎవరూ రావొద్దని చెప్పాను. నా పుట్టినరోజు నాడు బ్యానర్లు, కటౌట్లు పెట్టడం మానేయాలని ఎన్నోసార్లు కోరాను. నాపై ప్రేమను చూపించాలంటే మీ భవిష్యత్తు కోసం ఏదైనా చేసుకోండి. నేను ఇక్కడకు వచ్చేటప్పుడు కూడా కొందరు బైకులపై వేగంగా నా కారును వెంబడించారు. దయచేసి అలా చేయకండి. ప్రమాదాలు జరుగుతున్నాయి కాబట్టే నాకు పుట్టినరోజు వస్తోందంటేనే భయమేస్తోంది. చనిపోయిన వారిని తిరిగి తీసుకురాలేం. ఇకపై వారి కుటుంబాల బాధ్యత నాది’ అని చెప్పారు.

ఈ ఘటనలో మరో ముగ్గురు అభిమానులు తీవ్రంగా గాయపడ్డారు. వారు చికిత్స పొందుతున్న ఆసుపత్రికి వెళ్లి యశ్‌ పరామర్శించారు. ఆరోగ్య వివరాలు అడిగి తెలుసుకున్నారు. వారికి కూడా అండగా ఉంటానని భరోసానిచ్చారు.