ఎన్‌టీపీసీ లాభం రూ.4,854 కోట్లు

మధ్యంతర డివిడెండు రూ.4.25

దిల్లీ: ప్రభుత్వ రంగ విద్యుత్‌ దిగ్గజం ఎన్‌టీపీసీ డిసెంబరు త్రైమాసికంలో రూ.4,854.36 కోట్ల ఏకీకృత నికర లాభాన్ని నమోదు చేసింది. క్రితం ఆర్థిక సంవత్సరం ఇదే సమయంలో సంస్థ ఆర్జించిన నికర లాభం రూ.4,626.11 కోట్లతో పోలిస్తే ఇది 5 శాతం అధికం. మొత్తం ఆదాయం రూ.33,783.62 కోట్ల నుంచి రూ.44,989.21 కోట్లకు పెరిగింది.

* రూ.10 ముఖ విలువ కలిగిన ఒక్కో షేరుకు 42.5 శాతం (రూ.4.25) చొప్పున మధ్యంతర డివిడెండు చెల్లించేందుకు డైరెక్టర్ల బోర్డు నిర్ణయించింది.

* 2022 ఏప్రిల్‌-డిసెంబరు మధ్య కంపెనీ సరాసరి విద్యుత్‌ టారిఫ్‌ యూనిట్‌కు రూ.4.96 లభించింది. ఏడాది క్రితం ఇదే సమయంలో ఇది రూ.3.95 మాత్రమే.

* బొగ్గు ఆధారిత థర్మల్‌ పవర్‌ ప్లాంట్ల ప్లాంటు లోడ్‌ ఫ్యాక్టర్‌ (పీఎల్‌ఎఫ్‌ లేదా సామర్థ్య వినియోగం) 67.72 శాతం నుంచి 68.85 శాతానికి చేరింది.

* దిగుమతి చేసుకున్న బొగ్గు సరఫరా 0.52 మిలియన్‌ మెట్రిక్‌ టన్నుల నుంచి 1.57 మి.మె.టన్నులకు చేరింది.

* దేశీయ బొగ్గు సరఫరా 54.96 మి.మె.టన్నుల నుంచి 52.45 మి.మె.టన్నులకు తగ్గింది. క్యాప్టివ్‌ గనుల నుంచి బొగ్గు ఉత్పత్తి 4 మి.మె.టన్నుల నుంచి 5.35 మి.మె.టన్నులకు చేరింది.

* సంయుక్త సంస్థలు (జేవీలు), అనుబంధ సంస్థలతో కలిపి ఎన్‌టీపీసీ గ్రూప్‌ మొత్తం ఇన్‌స్టాల్డ్‌ సామర్థ్యం 2022 డిసెంబరు 31 నాటికి 70,884 మెగావాట్లకు చేరింది.

* స్థూల విద్యుత్‌ ఉత్పత్తి 75.67 బిలియన్‌ యూనిట్ల (బీయూ) నుంచి 78.64 బి.యూనిట్లకు చేరింది.