GST reward: జీఎస్‌టీ రివార్డ్‌ స్కీమ్‌.. రూ.కోటి వరకు ప్రైజ్‌ మనీ

దిల్లీ: వస్తు, సేవల పన్ను (GST) ఎగవేతను నిరోధించేందుకు కేంద్రం వ్యాపారులకు పలు నిబంధనలను అమలు చేస్తోంది. ఈ ప్రక్రియలో ఇప్పుడు కస్టమర్లను కూడా భాగస్వాములను చేస్తోంది. త్వరలోనే ‘మేరా బిల్‌ మేరా అధికార్‌ (Mera Bill Mera Adhikar)’ పేరుతో సరికొత్త ఇన్‌వాయిస్‌ ప్రోత్సాహక పథకాన్ని (GST reward scheme) ప్రారంభించనుంది. ఈ రివార్డు స్కీమ్‌తో కస్టమర్లు రూ.10వేల నుంచి రూ.కోటి వరకు నగదు బహుమతి పొందొచ్చు. ఏంటీ కొత్త స్కీం..? ఎందుకోసం తీసుకొస్తున్నారు..?

కస్టమర్లు తాము కొనుగోలు చేసిన ప్రతి వస్తువుకు విక్రయదారుల నుంచి బిల్లు అడిగేలా వారిని ప్రోత్సహించేలా కేంద్ర ప్రభుత్వం ఈ కొత్త పథకాన్ని ప్రవేశపెడుతోంది. సెప్టెంబరు 1 నుంచి మూడు రాష్ట్రాలు, మూడు కేంద్ర పాలిత ప్రాంతాల్లో ఈ స్కీమ్‌ను ప్రారంభించనున్నట్లు కేంద్ర పరోక్ష పన్నులు, కస్టమ్స్‌ బోర్డు (CBIC) మంగళవారం వెల్లడించింది. కస్టమర్లు తాము కొనుగోలు చేసిన వస్తువుల జీఎస్‌టీ ఇన్‌వాయిస్‌ (Invoice)లను చూపించి రివార్డులు గెలుచుకోవచ్చని తెలిపింది.

కొత్త అవకాశాలు.. ఖాళీ పోస్టుల భర్తీ: నియామకాలు బాగుంటాయ్‌

ఈ రివార్డు స్కీం ఎలా ఉంటుందంటే..

• ఇందుకోసం ‘మేరా బిల్‌ మేరా అధికార్‌ (Mera Bill Mera Adhikar)’ పేరుతో మొబైల్‌ యాప్‌ను అందుబాటులోకి తీసుకురానున్నారు.
• కస్టమర్లు తాము కొనుగోలు చేసిన వస్తువులకు సంబంధించిన ఇన్‌వాయిస్‌లను ఇందులో అప్‌లోడ్‌ చేయాల్సి ఉంటుంది.
• ఈ ఇన్‌వాయిస్‌ (Invoice)లపై విక్రేతల GSTIN నంబరు, ఇన్‌వాయిస్‌ నంబరు, చెల్లించిన మొత్తం, ట్యాక్స్ అమౌంట్‌ కచ్చితంగా ఉండాలి.
• కేవలం జీఎస్‌టీ నమోదిత సప్లయర్లు విక్రయించిన వస్తువులు, సేవలకు సంబంధించిన బిల్లులకు మాత్రమే ఈ రివార్డు వర్తిస్తుంది.
• ఈ స్కీమ్‌ కింద నెలా వారీ, లేదా మూడు నెలలకోసారి లక్కీ డ్రా తీసి విజేతలను ప్రకటిస్తారు. డ్రాలో గెలిచిన వారు రూ.10వేల నుంచి రూ.కోటి వరకు నగదు బహుమతి గెలుచుకునే అవకాశం ఉంటుందని CBIC ఎక్స్‌ (ట్విటర్‌)లో వెల్లడించింది.
• కనీసం రూ.200 అంతకంటే ఎక్కువ మొత్తం వెచ్చించిన ఇన్‌వాయిస్‌లను లక్కీ డ్రాకు పరిగణిస్తారు. ఒక కస్టమర్‌ నెలకు గరిష్ఠంగా 25 ఇన్‌వాయిస్‌లను అప్‌లోడ్‌ చేసుకునే వీలుంటుంది.
• ఈ మొబైల్‌ యాప్‌ ఆండ్రాయిడ్‌, ఐఓఎస్‌ వెర్షన్లలో అందుబాటులో ఉండనుంది.
• సెప్టెంబరు 1న అస్సాం, గుజరాత్‌, హరియాణా, పుదుచ్చేరీ, దమన్‌ దయ్యూ, దాద్రా నగర్‌ హవేలీ ప్రాంతాల్లో ఈ స్కీమ్‌ను ప్రారంభించనున్నారు. త్వరలోనే దేశవ్యాప్తంగా దీన్ని అందుబాటులోకి తీసుకురానున్నట్లు తెలుస్తోంది.

వినియోగదారులు తాము కొన్న వస్తువులకు విక్రేతల నుంచి వాస్తవమైన ఇన్‌వాయిస్‌లను అడిగే విధంగా వారిని ప్రోత్సహించేలా ఈ రివార్డు స్కీమ్‌ను తీసుకొస్తున్నట్లు అధికారులు తెలిపారు. తద్వారా వ్యాపారులు పన్ను ఎగవేసేందుకు ఆస్కారం ఉండదని అంటున్నారు.