Sam Altman: శామ్‌ ఆల్ట్‌మన్‌ మళ్లీ సీఈఓగా రానున్నారా? బోర్డు చర్చలు అందుకేనా?

వాషింగ్టన్‌: చాట్‌జీపీటీ (ChatGPT) సృష్టికర్త శామ్‌ ఆల్ట్‌మన్‌ (Sam Altman)ను సీఈఓ బాధ్యతల నుంచి తొలగిస్తూ ఓపెన్‌ఏఐ (OpenAI) తీసుకున్న నిర్ణయం టెక్‌ ప్రపంచంలో తీవ్ర చర్చకు దారితీసింది. తిరిగి ఆయననే సీఈఓగా తీసుకురావాలని ఓపెన్‌ఏఐ ఇన్వెస్టర్లు ఒత్తిడి తెస్తున్నట్లు తెలుస్తోంది. కంపెనీలో అతిపెద్ద వాటాదారుగా ఉన్న మైక్రోసాఫ్ట్‌తో కొంత మంది ఇన్వెస్టర్లు చర్చలు జరుపుతున్నట్లు సమాచారం. ఈ నేపథ్యంలో ఆల్ట్‌మన్‌ (Sam Altman)తో కంపెనీ బోర్డు చర్చిస్తున్నట్లు ఈ వ్యవహారంతో సంబంధం ఉన్న వ్యక్తులు తెలిపారు.

ఓపెన్‌ఏఐ (OpenAI)లోని కొంత మంది సిబ్బంది సైతం బోర్డును హెచ్చరించినట్లు సమాచారం. ఆల్ట్‌మన్‌ (Sam Altman)ను సీఈఓగా తిరిగి తీసుకురాకపోతే తాము కంపెనీ నుంచి వైదొలగుతామని తేల్చి చెప్పినట్లు తెలుస్తోంది. మరోవైపు మైక్రోసాఫ్ట్‌ సీఈఓ సత్య నాదెళ్ల సైతం ఆల్ట్‌మన్‌తో సంప్రదింపులు జరుపుతున్నట్లు సమాచారం. తాత్కాలిక సీఈఓ మిరా మురాటికి ఆయన మద్దతు ప్రకటించిన విషయం తెలిసిందే. అయితే, బోర్డు నిర్ణయం మేరకే ఆయన తన అభిప్రాయాన్ని అలా వ్యక్తపరిచినట్లు తెలుస్తోంది.

ఆల్ట్‌మన్‌ ఉద్వాసనకు కారణాలివేనా?

మరోవైపు ఆల్ట్‌మన్‌ (Sam Altman) సొంతంగా ఓ కంపెనీని ప్రారంభించే యోచనలో ఉన్నట్లు వార్తలు వస్తున్నాయి. ఆయన తొలగింపును నిరసిస్తూ వైదొలగిన ఓపెన్‌ఏఐ సహ వ్యవస్థాపకుడు, అధ్యక్షుడు గ్రెగ్‌ బ్రాక్‌మన్‌ సైతం కొత్త సంస్థలో భాగమయ్యే అవకాశం ఉన్నట్లు తెలుస్తోంది.

శామ్‌ ఆల్ట్‌మన్‌ను సీఈఓ బాధ్యతల నుంచి తొలగిస్తూ ఓపెన్‌ఏఐ సంస్థ నిర్ణయం తీసుకున్న విషయం తెలిసిందే. ఆయన స్థానంలో తాత్కాలికంగా చీఫ్‌ టెక్నాలజీ ఆఫీసర్‌ మిరా మురాటీ సీఈఓగా వ్యవహరిస్తారని కంపెనీ ప్రకటించింది. ఆల్ట్‌మన్‌ను బాధ్యతల నుంచి తొలగించిన గంటల వ్యవధిలోనే సహ వ్యవస్థాపకుడు, అధ్యక్షుడు గ్రెగ్‌ బ్రాక్‌మన్‌ తన పదవికి రాజీనామా చేశారు.