Tata Play IPO: రహస్యంగా ఐపీఓకి దరఖాస్తు చేసుకున్న తొలి కంపెనీ టాటా ప్లే!

ముంబయి: ప్రి-ఫైలింగ్‌ మార్గాన ఐపీఓకి దరఖాస్తు చేసుకున్న తొలి కంపెనీగా టాటా ప్లే (గతంలో టాటా స్కై) నిలిచింది. నవంబరు 29న ఈ కంపెనీ రహస్యంగా సెబీకి పబ్లిక్‌ ఇష్యూకి సంబంధించిన ముసాయిదా పత్రాలను సమర్పించింది. పత్రికల్లో ప్రకటనల ద్వారా ఈ విషయం వెలుగులోకి వచ్చింది.

ఐపీఓకి సంబంధించిన కొన్ని నిబంధనల్ని సెబీ గత నెలలోనే సవరించింది. అందులో భాగంగా కంపెనీలు పబ్లిక్‌ ఇష్యూకి సంబంధించిన వివరాలను బహిర్గతం చేయాల్సిన అవసరం లేదు. ఐపీఓకి సంబంధించిన అన్ని అంశాల్లో కంపెనీకి స్పష్టత వచ్చే వరకు ఈ వివరాల్ని రహస్యంగా ఉంచొచ్చు. ముసాయిదా పత్రాలు కేవలం సెబీకి మాత్రమే అందుబాటులో ఉంటాయి. ఈ ప్రత్యామ్నాయ విధానాన్ని రహస్య ఫైలింగ్‌గా పేర్కొంటున్నారు. ఇది అమెరికాలో ఇప్పటికే అమల్లో ఉంది.

ఐపీఓ దరఖాస్తుపై సెబీ తమ పరిశీలనలను సంస్థకు తెలియజేస్తుంది. తదనుగుణంగా కంపెనీలు మార్పులు చేసి మరోసారి పత్రాలు సమర్పించాలి. అప్పుడు మాత్రం వివరాల్ని బహిర్గతం చేయాల్సి ఉంటుంది. ఐపీఓకి వెళ్లేందుకు కంపెనీలు కచ్చితంగా నిర్ణయించుకునే వరకు వ్యాపారపరమైన రహస్యాలు బహిర్గతం కాకుండా ఉండాలనే ఉద్దేశంతోనే సెబీ ఈ విధానాన్ని ప్రవేశపెట్టింది. ఇకపై చాలా కంపెనీలు ఈ మార్గాన్ని ఆశ్రయించే అవకాశం ఉందని మార్కెట్‌ నిపుణులు అంచనా వేస్తున్నారు.