సీఎం వస్తే ఇంతే మరి!

బస్సుల్లేక యాతన

వెలవెలబోతున్న పాలకొల్లు బస్టాండ్‌

భీమవరం అర్బన్‌, న్యూస్‌టుడే: ఏ ప్రాంతంలోనైనా సీఎం జగన్‌మోహన్‌రెడ్డి పర్యటన, సభలు అంటే ఆర్టీసీ ప్రయాణికులు అవస్థలు తప్పడం లేదు. సోమవారం హనుమాన్‌ జంక్షన్‌ నుంచి నారాయణపురం వరకు జరిగిన ముఖ్యమంత్రి బస్సుయాత్రకు జనాన్ని తరలించేందుకు ఆర్టీసీ బస్సులను కేటాయించారు. పశ్చిమగోదావరి జిల్లాలో మొత్తం 296 బస్సులు ఉండగా వాటిలో 100 వరకు యాత్ర కోసం కేటాయించారు. మిగిలిన బస్సులు ప్రయాణికుల రద్దీకి ఏ మాత్రం చాలక సామాన్యులు అవస్థలు పడ్డారు. ఎండ తీవ్రత, ఉక్కబోత వాతావరణంలో ప్రయాణికులు గంటల తరబడి బస్సుల కోసం వేచి చూడాల్సి వచ్చింది. డిపోల వారీగా భీమవరం- 30, తణుకు- 30, నరసాపురం, తాడేపల్లిగూడెం డిపోల నుంచి 20 చొప్పున బస్సుల చొప్పున తరలించారు. బీ జగన్‌ బస్సు యాత్ర మంగళవారం భీమవరం చేరుకోనుంది. ఇక్కడ జరిగే సభలో ఆయన పాల్గొంటారు. ఈ నేపథ్యంలో సోమవారం రాత్రి భీమవరం-ఉండి రోడ్డులో పలు చెట్ల కొమ్మలను తొలగించారు. జగన్‌ పర్యటనకు వచ్చిన ప్రతిసారీ పచ్చని చెట్లపై గొడ్డలి వేటు తప్పడం లేదని ప్రకృతి ప్రేమికులు వాపోతున్నారు.

ఏలూరు బస్టాండులో ప్రయాణికుల నిరీక్షణ

భీమవరంలో పడిగాపులు