సిద్ధం బస్సు యాత్ర.. రెండేళ్లు నిర్లక్ష్యం చేసి ఇప్పుడు మరమ్మతులు

ఉండి, న్యూస్‌టుడే: రెండేళ్ల నుంచి కనీస మరమ్మతులు లేకపోవడంతో ఉండి మండలంలో కోలమూరు- ఆరేడు రహదారి అధ్వాన స్థితికి చేరింది. భారీ గుంతల కారణంగా కొన్నినెలల కిందట జరిగిన ప్రమాదంలో ఇద్దరు ప్రాణాలు కోల్పోయారు. వేర్వేరు ఘటనల్లో పలువురు గాయాలపాలయ్యారు. నిత్యం రద్దీగా ఉండే ఈ రోడ్డుకు మరమ్మతులు చేపట్టాలని ప్రజలు వేడుకున్నా అధికారులు, ప్రజాప్రతినిధులు పట్టించుకోలేదు. ఈ మార్గంలో సుమారు 5 కిలోమీటర్ల మేర మరమ్మతులకు రూ.80 లక్షల నిధులు మంజూరైనా పనులు చేపట్టేందుకు గుత్తేదారులు ముందుకు రాలేదు. ‘మేమంతా సిద్ధం’ పేరిట ముఖ్యమంత్రి జగన్‌ చేపట్టిన బస్సు యాత్ర ఈ మార్గం మీదుగా వస్తుందనే సమాచారంతో యంత్రాంగం అప్రమత్తమై సోమవారం యుద్ధప్రాతిపదికన మరమ్మతులు చేపట్టింది. అప్పటికప్పుడు కంకర దిగుమతి చేసి గుంతలు పూడ్చి తారుపూత వేశారు. హడావుడిగా చేస్తున్న ఈ పనులు ఎంతకాలం నిలుస్తాయంటూ స్థానికులు సందేహాలు వ్యక్తం చేస్తున్నారు.