Crime News: తన ఫొటో పంపి పోలీసులకు సవాల్‌ విసిరిన దొంగ దొరికాడు

సత్యేంద్ర సింగ్‌

ఈనాడు, హైదరాబాద్‌ న్యూస్‌టుడే, జూబ్లీహిల్స్‌: ‘నా ఫొటో పంపుతున్నా.. చిరునామా కూడా ఇస్తున్నా. చేతనైతే పట్టుకోండి చూద్దా’మంటూ పోలీసులకు సవాల్‌ విసిరిన ఖరీదైన కార్ల దొంగ సత్యేంద్రసింగ్‌ షెకావత్‌ను నగర పోలీసులు పట్టుకున్నారు. గుజరాత్‌, కర్ణాటక, మహారాష్ట్ర, రాజస్థాన్‌, తెలంగాణ తదితర రాష్ట్రాల్లో ఖరీదైన కార్లను చోరీ చేసిన కేసులున్నాయి. ఇటీవల బెంగళూరు పోలీసులు ఇతడిని అరెస్టు చేయటంతో పాత కేసుల్లో విచారించేందుకు బంజారాహిల్స్‌ పోలీసులు పీటీ వారెంట్‌పై తీసుకొచ్చి చంచల్‌గూడ జైలుకు తరలించారు. శుక్రవారం సాయంత్రం పోలీసు కస్టడీకు తీసుకొన్నారు. గతేడాది జనవరిలో బంజారాహిల్స్‌లోని ప్రముఖ హోటల్‌లో బస చేసిన కన్నడ సినీ నిర్మాత వి.మంజునాథ్‌ కారు చోరీకి గురైంది. దీనిపై కేసు నమోదు చేసిన బంజారాహిల్స్‌ పోలీసులు దర్యాప్తు చేపట్టి షెకావత్‌ ముఠా చోరీ చేసినట్టు నిర్ధారించారు.