Naresh: కంగ్రాట్స్‌ మహేశ్‌బాబు.. నరేశ్‌ ట్వీట్‌

హైదరాబాద్‌: సూపర్‌స్టార్‌ మహేశ్‌బాబును (Mahesh Babu) ఉద్దేశిస్తూ నటుడు నరేశ్‌ (Naresh) ట్వీట్‌ చేశారు. ‘ఒక్కడు’ (Okkadu) రీ రిలీజ్‌కు సంబంధించిన ఓ వీడియోను ట్విటర్‌ వేదికగా షేర్‌ చేస్తూ మహేశ్‌, ఇతర బృందానికి అభినందనలు తెలిపారు. ‘‘‘ఒక్కడు’ విడుదలై 20 ఏళ్లు అయిన సందర్భంగా మహేశ్‌బాబు, నిర్మాత ఎం.ఎస్‌.రాజుతోపాటు టీమ్‌ మొత్తానికి నా అభినందనలు. ఒక సినిమాకు సంబంధించి 20 ఏళ్ల తర్వాత కూడా థియేటర్‌లో ప్రేక్షకులు ఈ విధంగా సందడి చేయడం చాలా అరుదు’’ అని నరేశ్‌ పేర్కొన్నారు.

టాలీవుడ్‌లో (Tollywood) గత కొంతకాలం నుంచి రీరిలీజ్‌ల (Movie Re Releases) హవా నడుస్తోన్న విషయం తెలిసిందే. అభిమానుల కోరిక మేరకు స్టార్‌ హీరోలు నటించిన ఒకప్పటి బ్లాక్‌బస్టర్‌ చిత్రాలకు ఆధునిక హంగులద్ది పలు థియేటర్లలో విడుదల చేస్తున్నారు. అలా, ఇప్పటికే విడుదలైన ‘పోకిరి’, ‘జల్సా’, ‘తమ్ముడు’, ‘చెన్నకేశవ రెడ్డి’, ‘వర్షం’, ‘బిల్లా’, ‘ఖుషి’ చిత్రాలు బాక్సాఫీస్‌ వద్ద మంచి కలెక్షన్స్‌ రాబట్టాయి. ఈనేపథ్యంలో జనవరి 7న తెలుగు రాష్ట్రాల్లోని పలు థియేటర్లలో ‘ఒక్కడు’ స్పెషల్‌ షోలు వేశారు. మహేశ్‌బాబు - భూమిక జంటగా నటించిన ఈ చిత్రానికి గుణశేఖర్‌ దర్శకత్వం వహించారు. ఫ్యాక్షనిజం, కబడ్డీ నేపథ్యంలో తెరకెక్కిన ఈ ప్రేమకథ అప్పట్లో బాక్సాఫీస్‌ వద్ద భారీ వసూళ్లు రాబట్టి.. మహేశ్‌ కెరీర్‌లోనే బిగ్గెస్ట్‌ హిట్‌గా నిలిచింది.