Chiranjeevi: ‘మిస్‌ శెట్టి మిస్టర్‌ పొలిశెట్టి’పై చిరంజీవి రివ్యూ..

హైదరాబాద్‌: నవీన్‌ పొలిశెట్టి - అనుష్క శెట్టి (Anushka Shetty) నటిస్తోన్న సినిమా ‘మిస్‌ శెట్టి మిస్టర్‌ పొలిశెట్టి’. పి.మహేష్‌బాబు తెరకెక్కించిన ఈ చిత్రం మరో రెండురోజుల్లో (సెప్టెంబర్‌7) ప్రేక్షకుల ముందుకు రానుంది.  తాజాగా దీనిపై ప్రముఖ హీరో చిరంజీవి తన రివ్యూ తెలిపారు. సినిమాకు మొదటి ప్రేక్షకుడిని తానే అని చెప్పిన ఆయన రెండోసారి కూడా చూడాలనుందంటూ తన కోరికను బయటపెట్టారు.

ఈ చిత్రబృందంపై ప్రశంసలు కురిపించిన చిరంజీవి ట్విటర్‌ వేదికగా తన అభిప్రాయాన్ని తెలియజేశారు. ‘‘మిస్‌ శెట్టి మిస్టర్‌ పొలిశెట్టి’ (Miss Shetty Mr. Polishetty) మొదటి నుంచి చివరి దాకా ఎంతగానో ఆకట్టుకుంది. ఓ హిలేరియస్‌ ఎంటర్‌టైనర్‌గా ఇది తెరకెక్కింది. ఈ చిత్రం నేటి యువత ఆలోచనా విధానాన్ని ప్రతిబింబించేలా సరికొత్త కథాంశంతో రూపొందింది. ఇక నవీన్‌ పొలిశెట్టి ‘జాతిరత్నాలు’ కంటే రెట్టింపు వినోదాన్ని అందజేశారు. అలాగే కొంచెం గ్యాప్‌ తీసుకుని నటించిన అనుష్క ఈ సినిమాలో మరింత అందంగా కనిపించారు. మనందరి దేవసేన ఈ చిత్రానికి ప్రాణం పోశారు. సినిమాలో భావోద్వేగాన్ని బాగా చూపించారు. ఈ విషయంలో దర్శకుడు మహేశ్‌ బాబుని అభినందించాల్సిందే’’.

‘బాహుబలి’ తర్వాత పాకిస్థాన్‌లోనూ అలా పిలిచారు: సత్యరాజ్‌

‘‘ఈ సినిమాకు తొలి ప్రేక్షకుడిని నేనే. ఇందులోని ప్రతి సన్నివేశాన్ని ఎంతో ఎంజాయ్‌ చేశా. థియేటర్లో విడుదలయ్యాక ప్రేక్షకులందరితో పాటు మరోసారి చూడాలనుంది. ‘మిస్‌ శెట్టి మిస్టర్‌ పొలిశెట్టి’ ఆడియన్స్‌ని వందశాతం నవ్వుల బాట పట్టిస్తుందనడంలో సందేహం లేదు’’ అంటూ చిత్రబృందానికి చిరంజీవి తన అభినందనలు తెలియజేశారు. వాళ్లతో ఉన్న ఫొటోలను షేర్‌ చేశారు. ఇక ట్వీట్‌ను రీట్వీట్‌ చేసిన అనుష్క ఆయనకు ధన్యవాదాలు తెలిపారు. ‘మీ ఆశీర్వాదం మా టీమ్‌ అందరికీ ఎంతో ముఖ్యమైనది’ అని పేర్కొన్నారు.