Krithi Shetty: స్టార్‌హీరో కుమారుడి వేధింపులు.. కృతిశెట్టి ఏమన్నారంటే

ఇంటర్నెట్‌డెస్క్‌: చిన్న వయసులోనే సక్సెస్‌ను ఎంజాయ్‌ చేస్తోన్న ముద్దుగుమ్మల్లో నటి కృతిశెట్టి (Krithi Shetty) ఒకరు. తొలి చిత్రం ‘ఉప్పెన’తో బాక్సాఫీస్‌ వద్ద సెన్సేషన్‌ క్రియేట్‌ చేసిన ఈ భామ.. తక్కువ సమయంలోనే టాలీవుడ్‌, కోలీవుడ్‌లో బిజీ అయ్యారు. కాగా, తాజాగా ఈమెకు సంబంధించిన ఓ వార్త నెట్టింట వైరల్‌గా మారింది.

ఓ స్టార్‌ హీరో తనయుడు తనను వేధించాడని, స్నేహం చేయమంటూ ఫోన్‌ చేసి విసిగించాడని, ఎక్కడికి వెళ్లినా తోడు రమ్మనేవాడని.. కృతి ఓ ఇంటర్వ్యూలో చెప్పినట్లు పలు వెబ్‌సైట్స్‌లో కథనాలు వెలువడ్డాయి. గత కొన్నిరోజులుగా వస్తోన్న ఈ వార్తలపై ఆమె అభిమానులు తీవ్రంగా చర్చించుకుంటున్నారు. ఈ నేపథ్యంలో ఆయా కథనాలను ఉద్దేశిస్తూ తాజాగా కృతిశెట్టి ట్వీట్‌ పెట్టారు.

• ఇదీ చదవండి: అందుకే చాలామంది హీరోయిన్స్‌కు అవకాశాలు రావడం లేదు: ఐశ్వర్య రాజేశ్‌

‘‘దయచేసి ఇలాంటి కథనాలు సృష్టించి.. అసత్య ప్రచారాలు చేయడం మానండి. ఈ నిరాధారమైన వార్తలను పెద్దగా పట్టించుకోకూడదని మొదట అనుకున్నాను. అంతకంతకు ఈ ప్రచారం మరింత విస్తృతంగా మారుతోన్న తరుణంలో స్పందించక తప్పడం లేదు’’ అని ఆమె తెలిపారు. కృతిశెట్టి ట్వీట్‌తో ఆ కథనాలకు ఫుల్‌స్టాప్‌ పడినట్లు అయ్యింది.

సినిమాల విషయానికి వస్తే.. ఇటీవల ‘కస్టడీ’తో అలరించిన ఈ భామ.. కెరీర్‌లో సూపర్‌ హిట్‌ కోసం శ్రమిస్తున్నారు. ప్రస్తుతం ఈమె ‘అజాయంతే రందం మోషణం’ (Ajayante Randam Moshanam) అనే మలయాళం సినిమాలో నటిస్తున్నారు. దీనితోపాటు జయంరవి ‘జీని’లోనూ ఛాన్స్‌ కొట్టేశారు.