Rajamouli: ‘బాహుబలి-1’.. ఆ దృశ్యాలు ఎప్పటికీ మర్చిపోను: రాజమౌళి

ఇంటర్నెట్‌డెస్క్‌: ప్రభాస్‌ (Prabhas) - రానా (Rana) ప్రధాన పాత్రల్లో నటించిన బిగ్గెస్ట్‌ యాక్షన్‌ ఎంటర్‌టైనర్‌ ‘బాహుబలి’ (Bahubali). రాజమౌళి (Rajamouli) దర్శకుడు. 2015లో విడుదలైన ‘బాహుబలి: ది బిగినింగ్‌’ను ఉద్దేశిస్తూ దర్శకధీరుడు రాజమౌళి తాజాగా ఓ ఆసక్తికర విషయాన్ని ట్వీట్‌ చేశారు. మరో కొన్నిరోజుల్లో ఈ సినిమా మ్యూజికల్‌ కాన్సర్ట్‌ నార్వేలో జరగనున్నట్లు చెప్పారు.

‘‘లండన్‌లోని రాయల్‌ ఆల్బర్ట్‌ హాల్‌లో జరిగిన ‘బాహుబలి: ది బిగినింగ్‌’ అద్భుత ప్రదర్శనను ఎప్పటికీ మర్చిపోలేను. ఆ దృశ్యాలు ఇప్పటికీ నా కళ్లలో అలాగే నిలిచి ఉన్నాయి. ఇక, ఇప్పుడు ఆగస్టు 18న నార్వేలోని స్టావెంజర్‌ ఒపెరా హౌస్‌లో ‘బాహుబలి -1’ ప్రదర్శన జరగనున్నందుకు ఆనందంగా ఉంది. స్టావెంజర్ సింఫనీ ఆర్కెస్ట్రా సారథ్యంలో ఇది ప్రదర్శన జరగనుంది’’ అని ఆయన పేర్కొన్నారు. చిత్ర నిర్మాతలు రాఘవేంద్రరావు, శోభూ యార్లగడ్డతో దిగిన ఓ ఫొటోని జక్కన్న అభిమానులతో పంచుకున్నారు. నార్వేలోని స్టావెంజర్‌ సిటీలో ఈ కాన్సర్ట్ హాల్‌ ఉంది. 2012లో దీనిని ప్రారంభించారు. 1500 మంది కూర్చొనే సామర్థ్యం కలిగిన ఈ హాల్‌లో ‘బాహుబలి-1’ ప్రదర్శన జరగడంపై సినీ ప్రియులు ఆనందం వ్యక్తం చేస్తున్నారు.

ఇంటిపేరు పాడుచేస్తున్నా అని తిట్టారు: నవీన్‌ పొలిశెట్టి

‘బాహుబలి’ చిత్రాన్ని రాజమౌళి రెండు భాగాలుగా తెరకెక్కించారు. బాహుబలిగా ప్రభాస్‌.. భళ్లాలదేవుడిగా రానా.. దేవసేనగా అనుష్క నటించి మెప్పించారు. 2015లో విడుదలైన ‘బాహుబలి-1’, 2017లో వచ్చిన ‘బాహుబలి-2’ తెలుగు సినీ ఖ్యాతిని ప్రపంచానికి చాటి చెప్పాయి. ఈ రెండు ప్రాజెక్ట్‌లకు సీక్వెల్‌గా ‘బాహుబలి 3’ తీసే ఆలోచన ఉందని, కాకపోతే అది ఇప్పుడే ఉండకపోవచ్చు అని గతంలో చిత్రబృందం వెల్లడించింది. ‘ఆర్‌ఆర్‌ఆర్‌’తో ఘన విజయం అందుకున్న రాజమౌళి ప్రస్తుతం మహేశ్‌బాబు సినిమా పనుల్లో బిజీ అయ్యారు.