Ranbir Kapoor: ఈ అవార్డు వారికే అంకితం.. అప్పుడు ఆయన్ను చూస్తే భయమేసింది: రణ్‌బీర్‌ కపూర్‌

గాంధీనగర్‌: బాలీవుడ్‌ ప్రముఖ హీరో రణ్‌బీర్‌ కపూర్‌ (Ranbir Kapoor) ఉత్తమ నటుడిగా ఫిల్మ్‌ఫేర్‌ అవార్డు (Filmfare Awards)ను అందుకున్నారు. ఈ పురస్కారాన్ని తన తండ్రి రిషి కపూర్‌, కుమార్తె రాహాలకు అంకితమిస్తున్నట్లు తెలిపారు. ఆ వేడుకలో తన తండ్రిని గుర్తుచేసుకుంటూ మాట్లాడారు. ‘‘నాన్నా.. నేను ఎప్పుడూ మీ గురించే ఆలోచిస్తా. మీరు నాపై చూపించిన ప్రేమ, ఆప్యాయతను రోజూ గుర్తుచేసుకుంటా. మీరు ఎక్కడున్నా ప్రశాంతంగా ఉండాలని ఈ వేదిక సాక్షిగా కోరుకుంటున్నా. నా కుమార్తె రాహా పుట్టిన వారం రోజుల తర్వాత ‘యానిమల్‌’ సినిమా చిత్రీకరణ ప్రారంభించాం. రాహా అంటే నాకు చాలా ఇష్టం. తన అల్లరిని మిస్‌ అవ్వకూడదని షూటింగ్‌ అయిపోయాక ఇంటికి వెళ్లిపోయేవాణ్ని. రాహా.. ఈ రోజు నువ్వు ఆడుకోవడానికి అమ్మ, నేను అవార్డులు తీసుకొస్తున్నాం’’ అని పేర్కొన్నారు. బాలీవుడ్‌ ప్రతిష్ఠాత్మకంగా భావించే ఫిల్మ్‌ఫేర్‌ అవార్డుల ప్రదానోత్సవం (69వ) గుజరాత్‌లోని గాంధీనగర్‌లో అట్టహాసంగా జరిగింది. ఉత్తమ నటుడిగా రణ్‌బీర్‌ (యానిమల్‌ చిత్రానికి), ఆయన భార్య అలియా భట్‌ ఉత్తమ నటిగా (రాకీ ఔర్‌ రాణీకీ ప్రేమ్‌ కహానీ) అవార్డులు అందుకున్నారు.

ఉత్తమ నటుడు రణ్‌బీర్‌.. ఉత్తమ చిత్రం 12th ఫెయిల్‌

టాలీవుడ్‌ డైరెక్టర్‌ సందీప్‌ రెడ్డి వంగా తెరకెక్కించిన చిత్రమే ‘యానిమల్‌’. తాజాగా ఇచ్చిన ఇంటర్వ్యూలో రణ్‌బీర్ క్లైమాక్స్‌ ఫైట్‌ గురించి ప్రత్యేకంగా మాట్లాడారు. ‘‘క్లైమాక్స్‌ చిత్రీకరణలో.. చొక్కా విప్పి ఫైట్‌ చేస్తున్నప్పుడు అందరూ చప్పట్లు కొట్టి నన్ను ప్రోత్సహించారు. దాంతో, కెమెరాలో బాగా కనిపిస్తా అనుకున్నా. కానీ, బాబీ దేవోల్‌ చొక్కా విప్పి ఫైట్‌ చేసేందుకు సిద్ధమవుతుండగా నేను, నా జిమ్‌ ట్రైనర్‌ అక్కడి నుంచి వెళ్లిపోవాలనుకున్నాం. ఆయన్ను చూస్తే అంత భయమేసింది’’ అని అన్నారు. ప్రతినాయకుడిగా నటించిన బాబీ దేవోల్‌ మంచి మార్కులు కొట్టేశారు. రష్మిక (Rashmika) కథానాయికగా నటించిన ఈ చిత్రంలో త్రిప్తి దిమ్రి, అనిల్ కపూర్, పృథ్వీరాజ్ కీలక పాత్రలు పోషించి, మెప్పించారు. ఈ సినిమా ప్రస్తుతం ఓటీటీ నెట్‌ఫ్లిక్స్‌లో స్ట్రీమింగ్‌ అవుతోంది.