Tim Cook: యాపిల్‌ సీఈఓను ఆకట్టుకున్న ‘ఆపేక్ష’ దీపావళి ఫొటో

ఇంటర్నెట్‌ డెస్క్‌: ముంబయికి చెందిన ఆపేక్షా మకర్‌ అనే ఫొటోగ్రాఫర్‌ తీసిన ఫొటో ఒకటి యాపిల్‌ సీఈఓ టిమ్‌ కుక్‌ను ఆకట్టుకుంది. తన ట్విటర్‌ వేదికగా ఆ చిత్రాన్ని పంచుకున్న ఆయన అద్భుతంగా ఉందంటూ ఆపేక్షను అభినందించారు. ‘‘దీపావళిని వెలుగుల పండుగ అని ఎందుకు పిలుస్తారో ఈ చిత్రం అందంగా వివరిస్తోంది’’ అని వ్యాఖ్యానించారు. ఈ సందర్భంగా ఆయన అందరికీ దీపావళి శుభాకాంక్షలు తెలియజేశారు. అందమైన అలంకరణ మధ్య ఓ దీపాన్ని వెలిగించి, దాన్ని చేత్తో రక్షిస్తున్నట్లుగా ఉన్న ఆ దృశ్యాన్ని ఐఫోన్‌తో క్లిక్‌మనిపించారు. కుక్‌ ట్వీట్‌ను స్క్రీన్‌షాట్‌ తీసిన ఆపేక్ష దాన్ని తన ఇన్‌స్టాగ్రామ్‌ ఖాతాలో పంచుకున్నారు. తన చిత్రాన్ని టిమ్‌ కుక్‌ ప్రశంసించడంపై సంతోషం వ్యక్తం చేశారు.  కృతజ్ఞతలు తెలిపారు. ఆమె కూడా అందరికీ దీపావళి శుభాకాంక్షలు తెలియజేశారు. ఇన్‌స్టా బయో ప్రకారం.. ఆపేక్ష ఒక ప్రొఫెషనల్‌ ఫొటోగ్రాఫర్‌. కియారా అడ్వాణీ, దీపికా పదుకొణె, అనుష్క శర్మ వంటి ప్రముఖులతో పాటు టాప్‌ బ్రాండ్లతో ఆమె పనిచేశారు.