బ్రిటిష్‌ ఎయిర్‌వేస్‌, ఖతార్‌ ఎయిర్‌వేస్‌ భాగస్వామ్య విస్తరణ

ఈనాడు, హైదరాబాద్‌: బ్రిటిష్‌ ఎయిర్‌వేస్‌, ఖతార్‌ ఎయిర్‌వేస్‌ మధ్య భాగస్వామ్య ఒప్పందం మరింత విస్తరణకు నోచుకుంది. ఈ రెండు ఎయిర్‌లైన్స్‌ కలిపి నూతనంగా 42 దేశాలకు సర్వీసులు నడిపిస్తున్నట్లు ఆయా సంస్థలు ప్రకటించాయి. ఇటలీ, మాల్దీవులు, నార్వే, సింగపూర్‌, స్వీడన్‌ వంటి దేశాలకు రెండు సంస్థల భాగస్వామ్యంతో సర్వీసులు నడుస్తున్నట్లు తెలిపాయి. దీనివల్ల విమాన టికెట్ల ధరలు, సర్వీసుల పరంగా ప్రయాణికులకు వెసులుబాటు లభించనుందని వివరించాయి. ఒకే టికెట్‌పై దోహా, లండన్‌ మధ్య ప్రయాణించేందుకు వీలు కలుగనుంది. రెండు సంస్థలు సంయుక్తంగా 60దేశాలలోని 185 గమ్యస్థానాలకు సర్వీసులు నడిపిస్తున్నట్లు బ్రిటిష్‌ ఎయిర్‌వేస్‌ సీఈవో సీయాన్‌ డోలే, ఖతార్‌ ఎయిర్‌వేస్‌ సీఈవో అక్బర్‌ అల్‌ బకర్‌ వివరించారు.