ఆహార సేవలకు భారీ గిరాకీ

2028 నాటికి 79.65 బి.డాలర్లకు విపణి: నివేదిక

దిల్లీ: భారత ఆహార సేవల విపణి 2028 నాటికి 79.65 బిలియన్‌ డాలర్ల (సుమారు రూ.6.51 లక్షల కోట్లు) స్థాయికి చేరుకుంటుందని ఆహార సేవలు, రెస్టారెంట్ల వ్యాపారం 2022-23 నివేదిక వెల్లడించింది. 2022లో 41.1 బి.డాలర్లుగా ఉన్న ఈ విపణి 11.19 శాతం వార్షిక సంచిత వృద్ధి రేటు (సీఏజీఆర్‌)ను సాధిస్తుందని తెలిపింది. ఫ్రాన్‌కార్ప్‌, రెస్టారెంట్‌ఇండియా.ఇన్‌లు సంయుక్తంగా దీన్ని రూపొందించాయి. నివేదిక ప్రకారం..

* కొవిడ్‌-19 సమయంలో సుమారు 20 లక్షల మందికి పైగా ఈ రంగంలో ఉద్యోగాలు కోల్పోయారు. అయితే 2025 నాటికి ఉపాధి అవకాశాలు మళ్లీ కోటికి చేరతాయని పరిశ్రమ వర్గాలు భావిస్తున్నాయి.

* రెస్టారెంట్లు, ఆహార సేవల విపణి దేశంలో రెండు విభాగాలుగా ఉంది. ఇందులో వ్యవస్థీకృతం కాని విభాగమే అధిక వాటా కలిగి ఉంది. వ్యవస్థీకృత విభాగం కూడా 2014-2020 మధ్య బలమైన వృద్ధి రేటును నమోదు చేసింది.

* దేశంలో క్విక్‌ సర్వీస్‌ రెస్టారెంట్ల (క్యూఎస్‌ఆర్‌) విపణి ఈ ఏడాది 690.21 మిలియన్‌ డాలర్లు ఉండగా, 2027 నాటికి 9.15 సీఏజీఆర్‌తో 1069.3 మి.డాలర్లకు చేరుకుంటుంది.

* 2020-2025 ఆర్థిక సంవత్సరాల మధ్య క్యూఎస్‌ఆర్‌ చైన్‌ మార్కెట్‌ 23 శాతం సీఏజీఆర్‌తో అత్యధిక వృద్ధి సాధించే ఉప విభాగంగా నిలవనుంది. చైన్‌ మార్కెట్‌లోనే కాకుండా పూర్తి ఆహార సేవల విపణిలో ఇది అధిక వృద్ధిని నమోదు చేస్తుంది.

* మెక్‌డొనాల్డ్స్‌, బర్గర్‌ కింగ్‌, డొమినోస్‌ వంటి పెద్ద ఆహార సేవల చైన్‌ వ్యాపారాలు దేశంలోని చిన్న పట్టణాలకు కూడా వ్యాపిస్తూ యువతరాన్ని ఆకట్టుకుంటుండటంతో గిరాకీ బాగా పెరుగుతోంది.

* ద్వితీయ, తృతీయ శ్రేణి నగరాల్లోని మధ్య స్థాయి ఆదాయ కుటుంబాలు ఫాస్ట్‌ఫుడ్‌ రెస్టారెంట్లపై గత రెండేళ్లలో వ్యయాల్ని రూ.2,500 నుంచి రూ.5,400కు పెంచాయి. అంటే 108 శాతం వృద్ధి నమోదైంది.

* 2021 నాటికి ఆహార సేవల రంగంలో 73 లక్షల మంది ఉపాధి పొందుతున్నారు. కొవిడ్‌-19 సమయంలో 20 లక్షల మంది ఉద్యోగాలు కోల్పోయారు. 2025 నాటికి మొత్తం ఉద్యోగుల సంఖ్య కోటికి చేరొచ్చని పరిశ్రమ అంచనా వేస్తోంది.

* ద్రవ్యోల్బణం ప్రభావంతో సుమారు 51 శాతం మంది వినియోగదార్లు తక్కువగా ఆర్డర్లు చేస్తున్నారు. 40 శాతం మంది తక్కువ ఆహార పదార్థాలను లేదా తక్కువ ధర కలిగిన వాటిని ఆర్డర్‌ చేస్తున్నారు.

* 2021లో 96 శాతం మంది ఆపరేటర్లు కీలకమైన ఆహారం లేదా పానీయాల కొరత ఎదుర్కొన్నారు. 2022-23 ఆర్థిక సంవత్సరంలోనూ ఇది కొనసాగొచ్చు. ఈ రంగాన్ని ప్రస్తుతం సరఫరా ఆలస్యం, కీలక ఆహార పదార్థాల కొరత వంటివి ఇబ్బంది పెడుతున్నాయి.