ఐటీసీ లాభంలో 22% వృద్ధి

దిల్లీ: ఐటీసీ మార్చి త్రైమాసికంలో ఏకీకృత ప్రాతిపదికన రూ.5,225.02 కోట్ల నికర లాభాన్ని ప్రకటించింది. 2021-22 ఇదే త్రైమాసిక లాభం రూ.4,259.68 కోట్లతో పోలిస్తే ఇది 22.66% అధికం. అన్ని విభాగాల్లో బలమైన వృద్ది నమోదుకావడం కలిసొచ్చినట్లు కంపెనీ తెలిపింది. ఇదే సమయంలో మొత్తం కార్యకలాపాల ఆదాయం రూ.17,754.02 కోట్ల నుంచి 7% వృద్ధితో రూ.18,799.18 కోట్లకు చేరింది. మొత్తం వ్యయాలు సైతం రూ.12,632.29 కోట్ల నుంచి 2.18% పెరిగి రూ.12,907.84 కోట్లుగా నమోదయ్యాయి. మొత్తం ఆదాయం 7.75% అధికమై రూ.19,667.94 కోట్లకు చేరింది. సిగరెట్లతో కలిపి మొత్తం ఎఫ్‌ఎమ్‌సీజీ విభాగ ఆదాయం రూ.11,325.63 కోట్ల నుంచి 15.07% పెరిగి రూ.13,033.43 కోట్లకు చేరింది. సిగరెట్ల వ్యాపారం 12.61% వృద్ధితో రూ.8,082.26 కోట్లకు పెరిగింది. ఎఫ్‌ఎమ్‌సీజీయేతర విభాగ ఆదాయం రూ.4,148.62 కోట్ల నుంచి 19.34% పెరిగి రూ.4,951.17 కోట్లుగా నమోదైంది. ఐటీసీ హోటల్‌ విభాగ ఆదాయం రెండింతలు పెరిగి రూ.808.72 కోట్లకు చేరింది.

పూర్తి ఆర్థిక సంవత్సరానికి.: 2022-23లో ఐటీసీ రూ.19,427.68 కోట్ల నికర లాభాన్ని నమోదుచేసింది. 2021-22లో ఆర్జించిన రూ.15,485.65 కోట్లతో పోలిస్తే ఇది 25.45% ఎక్కువ. మొత్తం కార్యకలాపాల ఆదాయం 17.34% వృద్ధి చెంది రూ.75,826.58 కోట్లకు చేరింది. ఐటీసీ నిర్వహణ ఆదాయం రూ.75,000 కోట్లను మించడం ఇదే మొదటిసారి. అన్ని విభాగాల ఆదాయం రూ.83,897.14 కోట్లుగా నమోదైంది.

డివిడెండ్‌ రూ.9.50: గత ఆర్థిక సంవత్సరానికి రూ.1 ముఖవిలువ కలిగిన ఒక్కో షేరుపై రూ.6.75 తుది డివిడెండ్‌, రూ.2.75 ప్రత్యేక డివిడెండ్‌ను డైరెక్టర్ల బోర్డు సిఫారసు చేసింది. మధ్యంతర డివిడెండ్‌ రూ.6నూ కలిపితే 2022-23లో మొత్తం డివిడెండ్‌ రూ.15.50కు చేరింది. స్వతంత్ర డైరెక్టర్‌గా అల్క భరుచా, పూర్తి స్థాయి డైరెక్టర్‌గా హేమంత్‌ మాలిక్‌ల నియామకానికి బోర్డు ఆమోదం తెలిపింది.
* ఫలితాల నేపథ్యంలో ఐటీసీ షేరు డీలాపడింది. ఇంట్రాడేలో 2.23% పడ్డ షేరు రూ.418.10 వద్ద కనిష్ఠాన్ని తాకి, చివరకు 1.87% నష్టంతో రూ.419.65 వద్ద ముగిసింది. కంపెనీ మార్కెట్‌ విలువ రూ.9,942.41 కోట్లు తగ్గి రూ.5.21 లక్షల కోట్లకు చేరింది.