FMCG రంగంలోకి రిలయన్స్‌ గ్రూప్‌.. ‘ఇండిపెండెన్స్‌’ పేరుతో ఉత్పత్తులు

దిల్లీ: ప్రముఖ వ్యాపార సంస్థ రిలయన్స్‌ గ్రూప్‌ (Reliance) ఫాస్ట్‌ మూవింగ్‌ కన్జ్యూమర్‌ గూడ్స్‌ (FMCG) రంగంలోకి అడుగుపెట్టింది. ఎఫ్‌సీఎం ఉత్పత్తులకు ఇండిపెండెన్స్‌ (Independence) అని నామకరణం చేశారు. గుజరాత్‌లోని అహ్మదాబాద్‌లో నిర్వహించిన కార్యక్రమంలో గురువారం ఈ బ్రాండ్‌ను లాంచ్‌ చేశారు. శుద్ధి చేసిన ఆహార పదార్థాలు, ఇతర నిత్యావసరాలను ఇండిపెండెన్స్‌ పేరుతో విక్రయించనున్నారు. రిలయన్స్‌ రిటైల్‌ వెంచర్స్‌ లిమిటెడ్‌ అనుబంధ సంస్థ రిలయన్స్‌ కన్జూమర్‌ ప్రొడక్ట్స్‌ ఈ బ్రాండ్‌ను తీసుకొచ్చింది.

వంట నూనెలు, పప్పులు, తృణ ధాన్యాలు, బిస్కెట్లు వంటి ప్యాకేజ్డ్‌ ఆహార పదార్థాలు, ఇతర నిత్యావసర సరకులను ఈ బ్రాండ్‌పై విక్రయించనున్నట్లు రిలయన్స్‌ రిటైల్‌ వెంచర్స్‌ డైరెక్టర్‌ ఇషా అంబానీ తెలిపారు. నాణ్యతకు పెద్ద పీట వేస్తూ అందుబాటు ధరలోనే ఈ ఉత్పత్తులను తీసుకొస్తున్నట్లు పేర్కొన్నారు. రాబోయే కొన్ని నెలల్లో గుజరాత్‌ వ్యాప్తంగా బ్రాండ్‌ను విస్తరించనున్నారు. తర్వాత దేశవ్యాప్తంగా ఈ బ్రాండ్‌ను తీసుకెళ్లాలని కంపెనీ నిర్ణయించింది. ఇటీవల జరిగిన రిలయన్స్‌ ఇండస్ట్రీస్‌ ఏజీఎంలో తొలుత ఎఫ్‌సీఎంజీ గురించి ప్రకటన వెలువడిన సంగతి తెలిసిందే. అందుకు అనుగుణంగానే ఆ కంపెనీ ఈ బ్రాండ్‌ను లాంచ్‌ చేసింది. రిలయన్స్‌ రిటైల్‌కు ప్రస్తుతం దేశవ్యాప్తంగా 16,500 స్టోర్లు ఉన్నాయి.