Spicejet: స్పైస్‌జెట్‌ 18వ వార్షికోత్సవ ఆఫర్‌.. ₹ 1818 ధరకే విమాన టికెట్‌

దిల్లీ: దేశీయ విమానయాన సంస్థ స్పైస్‌జెట్‌ (Spicejet) ప్రయాణికులకు ప్రత్యేక ఆఫర్‌ ప్రకటించింది. సంస్థ 18వ వార్షికోత్సవాన్ని పురస్కరించుకుని విమాన టికెట్ల (Flight Tickets)ను తక్కువ ధరకే అందిస్తున్నట్లు తెలిపింది. ఈ ఆఫర్‌తో ప్యాసింజర్లు రూ.1,818 ధరకే విమాన టికెట్‌ కొనుగోలు చేయొచ్చని తెలిపింది. బెంగళూరు-గోవా, ముంబయి-గోవా నగరాల మధ్య ప్రయాణించే వారు మాత్రమే ఈ ఆఫర్‌ కింద తక్కువ ధరకు టికెట్‌లు బుక్‌ చేసుకోవచ్చు. ఈ ఆఫర్‌ సేల్‌ 23 మే 2023 నుంచి 28 మే 2023 వరకు మాత్రమేనని తెలిపింది. టికెట్‌లు బుక్‌ చేసుకున్న వారు 1 జులై 2023 నుంచి 30 మార్చ్‌ 2024 వరకు ఎప్పుడైనా ప్రయాణించవచ్చు. 

ఈ ఆఫర్‌తోపాటు స్పైస్‌జెట్‌ మరికొన్ని డిస్కౌంట్‌ కూపన్లు కూడా అందిస్తోంది. 2023లో 18 ఏళ్లు వయసు కలిగిన లేదా 18వ పుట్టినరోజును సెలబ్రేట్ చేసుకునే ప్రయాణికులకు రూ. 3,000 విలువైన ఉచిత ఫ్లైట్‌ వోచర్‌ను ఇస్తోంది. ఈ కూపన్‌ కోసం జూన్‌ 10 తేదీలోపు స్పైస్‌జెట్‌కు తమ వివరాలను ఈ-మెయిల్‌ చేయాలి. తర్వాత 10 జులై వరకు కూపన్‌ పంపుతారు. దాన్ని ఉపయోగించి 31 ఆగస్టులోపు టికెట్‌ బుక్‌ చేసుకుని 30 సెప్టెంబరులోపు ప్రయాణించాలి. అయితే, టికెట్‌ బుకింగ్‌ విలువ రూ. 7,500 దాటిన వారికి మాత్రమే ఈ ఆఫర్‌ వర్తిస్తుందని స్పైస్‌జెట్ తెలిపింది. దాంతోపాటు స్పైస్‌మ్యాక్స్‌ ద్వారా టికెట్‌లు బుక్‌ చేసుకునే ప్రయాణికులకు 50 శాతం డిస్కౌంట్‌తోపాటు విమానంలో తమకు నచ్చిన సీటును కేవలం రూ. 18 చెల్లించి బుక్‌ చేసుకోవచ్చని తెలిపింది. స్పైస్‌జెట్‌ 23 మే 2005న దిల్లీ-అహ్మదాబాద్‌ మధ్య  తన తొలి విమాన సర్వీస్‌ను ప్రారంభించింది.