ఆడపిల్లనని వదిలేశావా ‘అమ్మ’

ఇంటి రేకులపై గుర్తు తెలియని పసికందు
ఆసుపత్రికి తరలించగా మృతి

ఆసుపత్రిలో చిన్నారి

జీడిమెట్ల, న్యూస్‌టుడే: తొమ్మిది నెలలు కడుపులో మోశారు.. ఈ లోకానికి రాగానే నిర్దాక్షిణ్యంగా వదిలేశారు. ఆడపిల్లను.. మీకు భారమవుతాననుకున్నారా..? గుక్క పెట్టి ఏడుస్తున్నా.. మీ గుండెలు కరగలేదా..? అప్పుడే లోకాన్ని చూసిన ఆ పసికందు మాట్లాడితే ఇలాగే ఉండేదేమో.. జీడిమెట్ల అయోధ్యానగర్‌లోని ఓ ఇంటి రేకులపై అప్పుడే పుట్టిన పసికందు(ఆడపిల్ల)ను ఎవరో వదిలేసి వెళ్లిపోయారు. ఏడుపులు విన్న స్థానికులు చేతుల్లోకి తీసుకొని పోలీసులకు సమాచారం అందించారు. వెంటనే స్పందించిన ఇన్‌స్పెక్టర్‌ పవన్‌ ఘటనా స్థలానికి వెళ్లారు. వైద్యం కోసం షాపూర్‌నగర్‌లోని యూహెచ్‌సీకి తరలించారు. అక్కడ ప్రథమ చికిత్స అనంతరం మెరుగైన వైద్యం కోసం నిలోఫర్‌ ఆసుపత్రికి తరలించేలా ఏర్పాటు చేశారు. ఆసుపత్రికి వెళ్లేసరికి ఆ చిన్నారి మృతి చెందింది. అక్కడ చిన్నారిని ఎవరు వదిలేశారు.. తల్లిదండ్రులే ఆడపిల్ల పుట్టిందని.. వదిలేశారా..? లేకుంటే ఎవరైనా గుర్తు తెలియని వ్యక్తులు అపహరించి తీసుకొచ్చి వదిలేశారా..? అనే కోణంలో దర్యాప్తు చేస్తున్నట్లు ఇన్‌స్పెక్టర్‌  చెప్పారు.