Indian 2: ‘ఇండియన్‌ 2’ కోసం అడ్వాన్స్‌డ్‌ టెక్నాలజీ.. ఆసక్తి రేకెత్తిసోన్న శంకర్‌ పోస్ట్‌

ఇంటర్నెట్‌ డెస్క్‌: సాంకేతికతకు పెద్దపీట వేస్తూ సినిమాలు తెరకెక్కించడంలో కోలీవుడ్‌ దర్శకుడు శంకర్‌ (Shankar) ముందుంటారు. తన ఆలోచనలకు టెక్నాలజీ జోడించి, ప్రేక్షకులకు కొత్త అనుభూతి పంచుతుంటారు. కెరీర్‌ ప్రారంభంలో ఓ పాటలోనో, ఏదైనా సన్నివేశంలోనో గ్రాఫిక్స్‌ని చూపించి మైమరపించిన ఆయన ‘రోబో’, ‘2.ఓ’ వంటి సినిమాలని విజువల్స్‌ ప్రధానంగా తెరకెక్కించిన సంగతి తెలిసిందే. ‘ఇండియన్‌ 2’ (భారతీయుడు 2) (Indian 2)కోసం ఆయన మరో అడుగు ముందుకేశారు. ఈ సినిమా కోసం అడ్వాన్స్‌డ్‌ టెక్నాలజీని వినియోస్తున్నట్టు తెలిపారు. ప్రముఖ సంస్థ లోలా (Lola VFX) ఈ చిత్రానికి వీఎఫ్‌ఎక్స్‌ అందించనుంది. ఇదే విషయాన్ని చెబుతూ సంబంధిత స్టూడియోలో దిగిన ఫొటోని సోషల్‌ మీడియా వేదికగా షేర్‌ చేశారు శంకర్‌. అందులో ఆయన అక్కడ జరిగే పనిని తదేకంగా చూస్తూ కనిపించారు. ప్రస్తుతం ఈ ఫొటో నెట్టింట వైరల్‌గా మారింది. ‘ఇండియన్‌ 2’ హాలీవుడ్‌ రేంజ్‌లో ఉంబోతోదంటూ సినీ ప్రియులు కామెంట్లు పెడుతున్నారు. లాస్‌ ఏంజెల్స్‌కు చెందిన ఈ సంస్థ ‘అవెంజర్స్‌’, ‘కెప్టెన్‌ మార్వెల్‌’, ‘బ్లాక్‌ పాంథర్‌’, ‘అవతార్‌’ తదితర హాలీవుడ్‌ హిట్‌ చిత్రాలకు విజువల్స్‌ అందించింది.

ఈ మార్పులు చేయండి.. అలియా-రణ్‌వీర్‌ చిత్రబృందానికి సెన్సార్‌ సూచన

శంకర్‌- హీరో కమల్‌ హాసన్‌ (Kamal Haasan) కాంబినేషన్‌లో 1996లో వచ్చిన సంచలన చిత్రం ‘ఇండియన్‌’ (భారతీయుడు). ఈ చిత్రానికి సీక్వెల్‌గా రూపొందుతున్నదే ‘ఇండియన్‌ 2’. యాక్షన్‌ థ్రిల్లర్‌గా రూపొందుతున్న ఈ చిత్రంలో కాజల్‌ అగర్వాల్‌, సిద్ధార్థ్‌, రకుల్‌ప్రీత్‌ సింగ్‌, ప్రియా భవానీ శంకర్‌, బాబీ సింహా, సముద్రఖని తదితరులు కీలకపాత్రలు పోషిస్తున్నారు. పలు కారణాల వల్ల వాయిదా పడిన ఈ సినిమా చిత్రీకరణ ప్రస్తుతం శరవేగంగా జరుగుతోంది. ఈ సినిమాతోపాటు శంకర్‌.. ‘గేమ్‌ ఛేంజర్‌’ (Game Changer)ని తెరకెక్కిస్తున్నారు. రామ్‌ చరణ్‌ (Ram Charan) హీరోగా రూపొందుతోన్న సినిమా ఇది. కియారా అడ్వాణీ (Kiara Advani) కథానాయిక.