Anushka: ‘మిస్‌ శెట్టి.. మిస్టర్‌ పొలిశెట్టి’ టీమ్ కీలక నిర్ణయం.. తెలుగు రాష్ట్రాల్లో మహిళల కోసం ప్రత్యేక షో..

హైదరాబాద్‌: నవీన్‌ పొలిశెట్టి, అనుష్కల  (Anushka) తాజా బ్లాక్ బస్టర్‌ ‘మిస్‌ శెట్టి.. మిస్టర్‌ పొలిశెట్టి’ (Miss Shetty Mr Polishetty). సెప్టెంబర్ 7న ప్రేక్షకుల ముందుకు వచ్చిన ఈ కామెడీ ఎంటర్‌టైనర్‌ సూపర్‌ హిట్‌ టాక్‌ను సొంతం చేసుకుని నిర్మాతలకు లాభాలు తెచ్చిపెడుతోంది. తాజాగా ఈ చిత్రబృందం కీలక నిర్ణయం తీసుకుంది. మహిళల కోసం ప్రత్యేకంగా ఈ సినిమాను ప్రదర్శించనున్నట్లు తెలిపింది. ఈ మేరకు నిర్మాణ సంస్థ ట్వీట్‌ చేసింది.

మహిళల కోసం గురువారం (సెప్టెంబర్‌ 14) ఈ సినిమాను ప్రత్యేకంగా ప్రదర్శించనున్నట్లు తెలిపింది. దీని కోసం రెండు తెలుగు రాష్ట్రాల్లో కొన్ని థియేటర్లను ఎంపిక చేసుకున్నట్లు ప్రకటించింది. వాటి వివరాలతో కూడిన పోస్టర్‌ను విడుదల చేసింది. ఇక ఈ విషయాన్ని తెలుపుతూ అనుష్క కూడా ఓ వీడియో విడుదల చేశారు. ‘‘మిస్‌ శెట్టి.. మిస్టర్‌ పొలిశెట్టి’పై ఎంతో ప్రేమ చూపుతున్నందుకు మీ అందరికీ ధన్యవాదాలు. మీరు చేసిన ట్వీట్స్‌, మెసేజ్‌లు అన్ని చూస్తుంటే నాకెంతో ఆనందంగా ఉంది. ఈ గురువారం కొన్ని థియేటర్లలో మహిళల కోసం మాత్రమే ఈ సినిమాను ప్రదర్శించనున్నాం. దీనికి మీ ఇంట్లో ఉన్న పెద్దవాళ్లను, చిన్న పిల్లలను కూడా తీసుకురండి. మరొకసారి మీరందరికీ కృతజ్ఞతలు’ అని అనుష్క చెప్పారు. 

ఆయన్ని నిందించకండి.. ఏ.ఆర్‌.రెహమాన్‌ కోసం సెలబ్రెటీల ట్వీట్స్‌

పి.మహేష్‌బాబు దర్శకత్వం వహించిన ఈ కామెడీ ఎంటర్‌టైనర్‌పై చిరంజీవి మొదలుకొని ఎంతో మంది సినీ తారలు ట్వీట్‌ చేశారు. అటు విదేశాల్లోనూ ఈ చిత్రం కాసులు కురిపిస్తోంది. సినిమా షూటింగ్‌ పూర్తవ్వగానే హీరో నవీన్‌ పొలిశెట్టి అమెరికాలోనూ వరుస ప్రమోషన్లు ఇచ్చి సందడి చేశారు. దీంతో విడుదలైన నాలుగు రోజులకే ఈ చిత్రం అక్కడ వన్‌ మిలియన్‌ డాలర్‌ కలెక్షన్స్‌ రాబట్టింది. ఇక నవీన్‌ పొలిశెట్టి గతంలో నటించిన ‘జాతిరత్నాలు’ కూడా అమెరికాలో వన్‌ మిలియన్‌ డాలర్లు వసూలు చేసిన సంగతి తెలిసిందే.