Marico: ఉద్యోగం నుంచి విరమణ తీసుకున్న వారికి మారికో మరో అవకాశం

దిల్లీ: ఏదేని కారణంతో మధ్యలోనే ఉద్యోగం నుంచి వైదొలగారా.. మళ్లీ ఉద్యోగ జీవితాన్ని ప్రారంభించాలని అనుకుంటున్నారా.. అయితే మీలాంటి వారి కోసమే ఎఫ్‌ఎమ్‌సీజీ సంస్థ ‘మారికో’.. ‘ఫోనిక్స్‌’ పేరిట ప్రత్యేక కార్యక్రమాన్ని ప్రారంభించింది. ఉద్యోగ జీవితంలో కనీసం ఒక ఏడాది విరామం ఇచ్చిన వృత్తి నిపుణులకు ఈ అవకాశం కల్పిస్తున్నట్లు పేర్కొంది.

‘ఆరోగ్య కారణాలు కావచ్చు.. వేరే ఇతర ఆశయాల సాధన కోసం కావచ్చు.. ఉద్యోగ జీవితానికి విరామం ఇచ్చిన వారి వ్యక్తిత్వాన్ని ఈ కార్యక్రమం గౌరవిస్తుంద’ని సంస్థ తెలిపింది. అయితే విరామానికి ముందు కనీసం రెండేళ్ల పాటు ఉద్యోగం చేసిన అనుభవం ఉన్న వాళ్లు ఈ కార్యక్రమానికి అర్హులని పేర్కొంది. ఇందులో ప్రాజెక్ట్‌ ఆధారితంగా నియామకాలు ఉంటాయి. 6 నెలలు, 9 నెలలు, 12 నెలల సమయానికి కన్సల్టెంట్‌లుగా నియమించుకుంటారు. ఆ తర్వాత వారి పనితీరు, ఉద్యోగ ఖాళీల ఆధారంగా.. వారిని పూర్తి స్థాయిలో కంపెనీలోకి చేర్చుకుంటారు. లేటరల్‌ హైరింగ్‌లో.. అనుభవం ఆధారంగా నేరుగా నియామకాలు చేపడతారు.