పట్టణ సహకార బ్యాంకులకు ఆర్‌బీఐ నాలుగంచెల నియమావళి

ముంబయి: పట్టణ సహకార బ్యాంకుల (యూసీబీలు) వర్గీకరణ కోసం నాలుగు అంచెల నిబంధనల నియమావళిని రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) గురువారం ప్రకటించింది. ఈ బ్యాంకుల నికర సంపద, మూలధన సమర్థతకు సంబంధించిన నిబంధనలను సైతం విడుదల చేసింది. సహకార బ్యాంకుల రంగంలో ఉన్న వైవిధ్యం కారణంగానే, ప్రస్తుత రెండంచెల నియమావళి స్థానంలో నాలుగంచెల నియమావళిని తీసుకురావాలని నిర్ణయించినట్లు వెల్లడించింది. యూసీబీల డిపాజిట్ల పరిమాణం ఆధారంగా తీసుకొచ్చిన ఈ నియమావళి తక్షణమే అమల్లోకి వచ్చినట్లు ఆర్‌బీఐ తెలిపింది. దీని ప్రకారం యూసీబీలను టైర్‌ 1, టైర్‌ 2గా వర్గీకరించారు. అన్ని యూనిట్‌ యూసీబీలు, వేతన ఆర్జన యూసీబీలు, రూ.100 కోట్ల వరకు డిపాజిట్లు కలిగిన ఇతర యూసీబీలను టైర్‌-1గా ఆర్‌బీఐ వర్గీకరించింది. రూ.100-1000 కోట్ల మధ్య డిపాజిట్లు కలిగిన యూసీబీలు టైర్‌-2గా, రూ.1000-10000 కోట్ల డిపాజిట్లు కలిగిన బ్యాంకులు టైర్‌-3గా, రూ.10000 కోట్లు పైబడిన యూసీబీలు టైర్‌-4గా విభజించింది.
* ఒక జిల్లాలో నిర్వహంచే టైర్‌ 1 యూసీబీల నికర విలువ కనీసం రూ.2 కోట్లు ఉండాలి. మిగిలిన అన్నీ రూ.5 కోట్ల కనీస విలువ కలిగి ఉండాలి. ప్రస్తుత బ్యాంకులు కూడా దశల వారీగా ఈ స్థాయికి చేరాలి.