Gold Imports: బంగారం దిగుమతుల్లో 30% తగ్గుదల.. కారణాలివే..!

దిల్లీ: గత ఆర్థిక సంవత్సరం (2022-23)లో ఏప్రిల్‌- ఫిబ్రవరి మధ్య బంగారం దిగుమతులు (Gold Imports) 30 శాతం తగ్గి 31.8 బిలియన్‌ డాలర్లకు చేరాయి. అధిక కస్టమ్స్‌ సుంకం, ప్రపంచవ్యాప్తంగా అస్థిర ఆర్థిక పరిస్థితులే దీనికి కారణమని కేంద్ర వాణిజ్య శాఖ తన నివేదికలో పేర్కొంది. 2021-22 ఇదే సమయంలో పసిడి దిగుమతులు (Gold Imports) 45.2 బిలియన్‌ డాలర్లుగా నమోదయ్యాయి. 2022 ఏప్రిల్‌ నుంచి దిగమతులు తగ్గుతూ వస్తున్నాయి.

2022-23లో ఏప్రిల్‌- ఫిబ్రవరి మధ్య వెండి దిగుమతులు 66 శాతం పెరిగి 5.3 బిలియన్‌ డాలర్లకు చేరాయి. పసిడి దిగుమతులు (Gold Imports) గణనీయంగా తగ్గినప్పటికీ.. వాణిజ్యలోటు (trade deficit) మాత్రం ఆ స్థాయిలో తగ్గకపోవడం గమనార్హం. 2022-23 ఏప్రిల్‌- ఫిబ్రవరి మధ్య సరకుల వాణిజ్య లోటు 247.52 బిలియన్‌ డాలర్లుగా అంచనా వేసింది. అంత క్రితం ఏడాది ఇదే సమయంలో ఇది 172.53 బిలియన్‌ డాలర్లుగా నమోదైంది.

ప్రపంచంలోనే అత్యధికంగా బంగారం దిగుమతి చేసుకునే దేశం భారత్‌. ముఖ్యంగా ఆభరణాల పరిశ్రమలో ఉండే డిమాండ్‌ వల్లే భారీ ఎత్తున పసిడిని దిగుమతి చేసుకోవాల్సి వస్తోంది. ఏడాదికి సగటున భారత్‌ 800- 900 టన్నుల బంగారాన్ని దిగుమతి చేసుకుంటోంది. మరోవైపు ఏప్రిల్‌- ఫిబ్రవరి 2023 మధ్య రత్నాలు, ఆభరణాల ఎగుమతులు 0.3 శాతం పడిపోయి 35.2 బిలియన్‌ డాలర్లుగా నమోదయ్యాయి. గత ఏడాది కేంద్ర ప్రభుత్వం బంగారం దిగుమతులపై సుంకాన్ని 10.75 శాతం నుంచి 15 శాతానికి పెంచింది. ప్రస్తుత ఖాతా లోటును తగ్గించడమే లక్ష్యంగా ఈ నిర్ణయం తీసుకుంది.