MEIL: మేఘా చేతికి మంగోలియా ఆయిల్‌ రిఫైనరీ ప్రాజెక్ట్‌

దిల్లీ:  మంగోలియాలో గ్రీన్‌ఫీల్డ్‌ ఆయిల్‌ రిఫైనరీ ప్రాజెక్ట్ నిర్మించే బాధ్యత మేఘా ఇంజినీరింగ్‌ అండ్‌ ఇన్‌ఫ్రాస్టక్చర్‌ లిమిటెడ్‌ (MEIL)కు దక్కించుకుంది. మంగోలియాలో నిర్మిస్తున్న తొలి రిఫైనరీ కర్మాగారం ఇదే. 790 మిలియన్‌ డాలర్ల విలువైన ఈ ప్రాజెక్ట్‌ నిర్మాణానికి సంబంధించి ఎల్‌ఓఏ అందుకున్నట్లు ఆ కంపెనీ ఓ ప్రకటనలో తెలిపింది. ఈ రిఫైనరీ నిర్మాణం వల్ల రష్యా నుంచి ఆయిల్‌ దిగుమతులు తగ్గించుకోవడంతో పాటు, పెట్రోలియం ఉత్పత్తుల అవసరాలను తీర్చుకోవడానికి ఆ దేశానికి వీలు పడుతుందని పేర్కొంది.

రిఫైనరీ ఆపరేషన్స్‌లో భాగంగా పైప్‌లైన్‌, పవర్‌ ప్లాంట్‌ కూడా నిర్మించనున్నారు. ఒకసారి ఈ రిఫైనరీ అందుబబాటులోకి వచ్చాక రోజుకు 30 వేల బ్యారెళ్ల క్రూడాయిల్‌ను ఈ కర్మాగారంలో శుద్ధి చేయడానికి వీలు పడుతుంది. భారత విదేశీ వ్యవహారాల మంత్రిత్వ శాఖ అభివృద్ధి భాగస్వామ్యంలో భాగంగా, భారత ప్రభుత్వ ఆర్థిక సహకారంతో మంగోలియా ప్రభుత్వం ఈ రిఫైనరీ నిర్మాణం చేపడుతోంది. ఈ ప్రాజెక్ట్‌ వల్ల భారత్‌- మంగోలియా బంధం బలపడడంతో పాటు హైడ్రోకార్బన్‌ రంగంలో కంపెనీ విస్తరణకు దోహదపడుతుందని కంపెనీ అధికార ప్రతినిధి తెలిపారు. ఇంధనం విషయంలో మంగోలియా ఇతర దేశాలపై ఆధారపడడం తగ్గడమే కాకుండా.. ఆ దేశ ఆర్థిక పరిపుష్టికి ఈ ప్రాజెక్ట్‌ దోహదం చేయనుందని పేర్కొన్నారు.