Microsoft: 3 ట్రిలియన్‌ డాలర్ల క్లబ్‌లోకి మైక్రోసాఫ్ట్‌.. AIతో కంపెనీ షేర్లకు బూస్ట్‌!

వాషింగ్టన్‌: ప్రముఖ టెక్‌ సంస్థ మైక్రోసాఫ్ట్‌ (Microsoft) మార్కెట్‌ క్యాపిటలైజేషన్‌ మూడు ట్రిలియన్‌ డాలర్లు దాటింది. ప్రపంచంలో ఈ కీలక మైలురాయిని దాటిన రెండో కంపెనీ ఇది. సంస్థ షేరు విలువ బుధవారం 1.3 శాతానికి పైగా పెరిగి 404 డాలర్లకు చేరడంతో ఈ రికార్డు నమోదైంది. ఐఫోన్ల తయారీ కంపెనీ యాపిల్‌ గతేడాది జూన్‌లో మూడు ట్రిలియన్‌ డాలర్ల మార్కెట్‌ విలువ సాధించిన తొలి సంస్థగా నిలిచింది. బుధవారం ఓ దశలో యాపిల్‌ను దాటేసిన మైక్రోసాఫ్ట్‌.. షేర్లు కుంగడంతో కిందకు దిగొచ్చింది.

2023లో మైక్రోసాఫ్ట్‌ (Microsoft) షేరు ధర 57 శాతానికి పైగా పుంజుకుంది. ఆ జోరు ఈ ఏడాది కూడా కొనసాగుతోంది. జనవరిలో ఇప్పటి వరకు ఏడు శాతానికి పైగా లాభపడింది. అదే సమయంలో నాస్‌డాక్‌ 100 సూచీ 4.6 శాతం పెరిగింది. కృత్రిమ మేధ (Artificial Intelligence- AI)పై మైక్రోసాఫ్ట్‌ పెట్టుబడులే స్టాక్‌ రాణించడానికి కారణమని ఆర్థిక నిపుణులు అంచనా వేస్తున్నారు. ఓపెన్‌ఏఐతో కలిసి ఇప్పటికే ఈ కంపెనీ కొత్త AI టూల్స్‌ను తీసుకొచ్చిన విషయం తెలిసిందే. రానున్న రోజుల్లో మరిన్ని అత్యాధునిక ఏఐ ఆవిష్కరణలపైనా పరిశోధనలు కొనసాగిస్తోంది. ఈ నేపథ్యంలో ఇన్వెస్టర్లు కంపెనీ పనితీరుపై బలమైన విశ్వాసంతో ఉన్నారని నిపుణుల అంచనా. త్వరలో మైక్రోసాఫ్ట్‌ త్రైమాసిక ఫలితాలను ప్రకటించనుంది. ఆదాయం, లాభాలు అంచనాలను మించుతాయని భావిస్తున్నారు.