Health Insurance: ఆరోగ్య బీమా తీసుకుంటున్నారా? ఈ జాగ్రత్తలు తీసుకోండి..
కుటుంబ వైద్య అవసరాలకు తగిన ఆరోగ్య బీమా పాలసీ ఎంచుకోవడం చాలా ముఖ్యం.
ఇంటర్నెట్ డెస్క్: జీవితంలో అనేక ఒడుదొడుకులు వస్తూనే ఉంటాయి. వైద్య అత్యవసర పరిస్థితులు కూడా ఇందులో భాగమే. అయితే వైద్యానికి అయ్యే ఖర్చులు నానాటికీ పెరుగుతుండడంతో భవిష్యత్ వైద్య ఖర్చులకు తగిన ఏర్పాటు చేసుకోవడం అవసరం. ఇందుకు ఉన్న ఏకైక మార్గం ఆరోగ్య బీమా పాలసీ కొనుగోలు. దీర్ఘకాలిక లక్ష్యాలు దెబ్బతినకుండా, ఆరోగ్య బీమా తీసుకోవడం ప్రతి కుటుంబానికీ ఎంతో అవసరం. గత రెండేళ్లుగా ప్రపంచ దేశాలు ఎదుర్కుంటున్న కొవిడ్ పరిస్థితులు ఆరోగ్య బీమాకు ఉన్న ప్రాధాన్యాన్ని తెలియజేస్తున్నాయి. ప్రజల్లో కూడా అవగాహన పెరిగింది. చాలా మంది ఆరోగ్య బీమాను తీసుకునేందుకు ఆసక్తి చూపుతున్నారు. కానీ పాలసీ ఎంపికలో మాత్రం తగిన జాగ్రత్తలు తీసుకోవడం లేదు. ఆరోగ్య బీమా కోసం ఏదో ఒక పాలసీ తీసుకోవడం వల్ల ఫలితం ఉండదు. కుటుంబ వైద్య అవసరాలకు తగిన బీమా పాలసీ ఎంచుకోవడం చాలా ముఖ్యం. ఏ బీమా సంస్థ నుంచి తీసుకోవాలి? కవరేజీ ఎంత ఉండాలి? బీమా సంస్థ ఎంత శాతం క్లెయిమ్లను పరిష్కరిస్తుంది? వెయిటింగ్ పిరియడ్ ఎంత? బీమా సంస్థ నో-క్లెయిమ్ బోనస్ అందిస్తుందా? లేదా? తదితర అంశాలను తెలుసుకోవాలి.
ఆరోగ్య బీమా కొనుగోలుకు ముందు పరిగణించాల్సిన అంశాలు..
వయసు: ఆరోగ్య బీమాలో పాలసీదారుని వయసు కీలకమైన అంశం అనే చెప్పాలి. ఇది ప్రీమియం నిర్ణయించడంలో ముఖ్య పాత్ర పోషిస్తుంది. చిన్న వయసులో ఉన్న వారు అనారోగ్యం బారిన పడేందుకు అవకాశాలు తక్కువగా ఉంటాయి. కాబట్టి ప్రీమియం తక్కువగా ఉంటుంది. పెద్ద వయసువారు అనారోగ్యం బారిన పడే అవకాశం ఎక్కువ. కాబట్టి ప్రీమియం ఎక్కువగా ఉంటుంది. ఫ్యామిలీ ఫ్లోటర్ పాలసీల ప్రీమియం కూడా కుటుంబ పెద్ద వయసు ఆధారంగానే నిర్ణయిస్తారు. అందుకే సాధారణంగా సీనియర్ సిటిజన్లు ఫ్యామిలీ ఫ్లోటర్ పాలసీలో చేర్చకుండా వారి కోసం విడిగా పాలసీ తీసుకోవాలని నిపుణులు సూచిస్తుంటారు. అలాగే, ఆరోగ్య బీమా కొనుగోలు సమయంలో వయో పరిమితిని తప్పనిసరిగా చూడాలి. కొన్ని పాలసీలకు కనీస, గరిష్ఠ ప్రవేశ వయసుపై పరిమితి ఉంటుంది. కనీస, గరిష్ఠ వయోపరిమితులు లేని పాలసీలను ఎంచుకోవడం మంచిది. ఇలా చేయడం వల్ల వయసు పెరిగినా, పాలసీ పునరుద్ధరణకు ఎలాంటి ఇబ్బందులూ ఉండవు.
ప్రీమియం, కవరేజీ: భవిష్యత్లో మనకు ఎలాంటి ఆరోగ్య ఇబ్బందులు వస్తాయో ఇప్పుడే ఊహించడం కష్టం. ఇప్పుడున్న పరిస్థితులే అప్పుడూ ఉంటాయని చాలామంది తక్కువ మొత్తానికి, తక్కువ ప్రీమియంతో పాలసీ తీసుకుంటారు. ఇక్కడ గుర్తుంచుకోవాల్సిన విషయం ఏమిటంటే తక్కువ ప్రీమియంతో అందుబాటులో ఉండే పాలసీల్లో అనేక పరిమితులు ఉంటాయి. ఫలితంగా, పాలసీ ఉండి కూడా సొంతంగా వైద్యం చేయించుకోవాల్సిన పరిస్థితులు తలెత్తుతాయి. అలా అని ప్రీమియం ఎక్కువగా ఉండే పాలసీలన్నీ మంచివని చెప్పలేం. మన అవసరాలకు తగిన కవరేజీ వస్తుందా? దానికి ఎంత ప్రీమియం చెల్లించవచ్చు?ప్రీమియంకి తగ్గ కవరేజీ లభిస్తుందా? ఇవన్నీ తెలుసుకున్నాకే సరైన పాలసీని తీసుకోవాలి.
వెయిటింగ్ పిరియడ్: ముందుగా నిర్ధారణ అయిన వ్యాధుల చికిత్సకు వెయిటింగ్ పిరియడ్ (నిర్ణీత వ్యవధి) తర్వాతే బీమా వర్తిస్తుంది. గరిష్ఠంగా ఇది నాలుగేళ్ల వరకు ఉండొచ్చు. అంటే, ఈ వ్యవధి ముగిసేవరకూ వీటి చికిత్స ఖర్చులను మీరే భరించాలన్నమాట. దీంతోపాటు కొన్ని రకాల వ్యాధులకు కూడా వేచి ఉండే సమయం ఉంటుంది. ఉదాహరణకు కంటి శుక్లాల శస్త్రచికిత్స, హెర్నియా లాంటి వాటికి పాలసీ తీసుకున్న ఏడాది, రెండేళ్ల తర్వాతే చికిత్సకు పరిహారం ఇస్తారు. కాబట్టి వీలైనంత తక్కువ వేచి ఉండే కాలం ఉన్న పాలసీలను తీసుకునేందుకు ప్రయత్నించాలి.
నగదు రహిత సేవలు: వైద్య అత్యవసరాల సమయంలో నగదు రహిత చికిత్సను అందించగలిగేలా పాలసీ ఉండాలి. అంటే, వైద్య అవసరాల నిమిత్తం ఆసుపత్రిలో చేరినప్పుడు పాలసీదారులు డబ్బు చెల్లించకుండా వైద్యం అందించేలా బీమా సంస్థలు, ఆసుపత్రులతో ఒప్పందం కుదుర్చుకుంటాయి. వీటినే నెట్ వర్క్ హాస్పిటల్స్ అంటారు. దీనివల్ల ఆసుపత్రి అడ్మిషన్ సమయంలో డబ్బు ఏర్పాట్లకు ఇబ్బంది పడాల్సిన అవసరం ఉండదు. అలాగే, రీయింబర్స్మెంట్ కోసం ఫైల్ చేయవలసిన అవసరం ఉండదు. బీమా సంస్థ నేరుగా ఆసుపత్రికి బీమా మొత్తాన్ని చెల్లిస్తుంది. అందువల్ల పాలసీ తీసుకునేటప్పుడు నెట్వర్క్ ఆసుపత్రుల జాబితాను చెక్ చేయాలి. మీరు నివాసం ఉండే ప్రాంతానికి దగ్గరలో నెట్ ఆసుప్రతులు ఉండడం మంచిది.
ఆసుప్రతిలో చేరక ముందు, తర్వాత ఖర్చులు: చాలా వరకు ఆరోగ్య బీమా ప్లాన్లు ఆసుపత్రిలో చేరినప్పుడు అయ్యే ఖర్చులను మాత్రమే కవర్ చేస్తాయి. ఆసుపత్రిలో చేరక ముందు, డిశ్చార్జ్ అయిన తర్వాత ఖర్చులు (అంబులెన్స్, వైద్య పరీక్షలు, వైద్యుడిని సంప్రదించినందుకు, మందుల ఖర్చులను) కవర్ చేయవు. ఇలాంటి వాటికి కూడా చాలానే ఖర్చవుతుంది. అందువల్ల ఈ ఖర్చులు కూడా పాలసీ చెల్లించే విధంగా ఉండాలి.
వార్షిక వైద్య పరీక్షలు: ప్రస్తుతం చాలా వరకు ఆరోగ్య బీమా పాలసీలు యాన్యువల్ ‘హెల్త్ చెకప్’ ప్రయోజనాన్ని అందిస్తున్నాయి. దీంతో పాలసీ తీసుకున్న వ్యక్తి ప్రతి సంవత్సరం ఉచితంగా వైద్య పరీక్షలు చేయించుకోవచ్చు. ఈ వైద్య పరీక్షలతో పాలసీదారుడు.. తమ ప్రస్తుత ఆరోగ్య స్థితి గురించి తెలుసుకోవడంతో పాటు, వివిధ రకాల వ్యాధులను ప్రాథమిక స్థాయిలోనే గుర్తించవచ్చు. ముఖ్యంగా జీవనశైలి వ్యాధులైన మధుమేహం, అధిక రక్తపోటు వంటివి ఒక్కోసారి ప్రాణాంతకంగా మారుతుంటాయి. ఇలాంటి వాటిని ముందుగానే గుర్తించడం వల్ల చాలా వరకు క్లిష్టమైన వ్యాధుల బారిన పడకుండా నివారించవచ్చు. అందువల్ల వార్షిక మెడికల్ చెకప్లు పాలసీలో భాగం అయ్యేలా చూసుకోవడం మంచిది.
కో-పేమెంట్స్, సబ్ లిమిట్స్: చాలా మంది పాలసీ కొనుగోలు సమయంలో 'కో-పేమెంట్' గురించి పట్టించుకోరు. క్లెయిమ్ సమయంలో దీని ప్రభావం తెలుస్తుంది. పాలసీలో కో-పేమెంట్ క్లాజ్ ఉంటే.. వైద్య ఖర్చులకు పాలసీ పేర్కొన్న నిష్పత్తిని అనుసరించి మాత్రమే బీమా సంస్థ చెల్లిస్తుంది. మిగిలిన మొత్తాన్ని పాలసీదారుడు స్వయంగా చెల్లించాలి. అలాగే, ప్రస్తుతం ఆసుపత్రుల గదుల అద్దెలు భారీగా ఉంటున్నాయి. ఇతర ఖర్చులూ అధికమే. ఇలాంటప్పుడు ఉప పరిమితులు ఉన్న పాలసీ తీసుకుంటే.. ఖర్చులు భారం అవుతాయి. ఎలాంటి పరిమితులూ లేకుండా వైద్య ఖర్చులు చెల్లించే పాలసీలే ఎప్పుడూ ఉత్తమం. పాలసీ ఎంపిక చేసుకునేప్పుడు ఈ విషయాలను తప్పనిసరిగా అడిగి తెలుసుకోవాలి.
నో క్లెయిమ్ బోనస్: ఒక పాలసీ సంవత్సరంలో ఎలాంటి క్లెయిమ్లూ లేకపోతే…పునరుద్ధరణ సమయంలో బీమా సంస్థలు నో క్లెయిమ్ బోనస్ ఇస్తాయి. ఫలితంగా పాలసీ మొత్తం 5 శాతం నుంచి 10 శాతం వరకూ పెంచుకోవచ్చు లేదా ప్రీమియం మొత్తం తగ్గించుకోవచ్చు. పాలసీ తీసుకునేటప్పుడు అధికంగా నో క్లెయిమ్ బోనస్ ఇచ్చే పాలసీలను పరిశీలించాలి. పెరుగుతున్న వైద్య ఖర్చులను తట్టుకునేందుకు ఇది మంచి అవకాశం. ప్రీమియంలో తగ్గింపు కన్నా.. పాలసీ మొత్తాన్ని పెంచే పాలసీలే ఎప్పుడూ ఉత్తమం.
క్లెయిమ్ సెటిల్మెంట్ రేషియో: ఒక పాలసీని ఎంచుకోవాలనుకున్నప్పుడు అంతర్గతంగా ఉన్న అనేక నిబంధనలను పరిశీలించడంతోపాటు.. చూడాల్సిన మరో ముఖ్యమైన అంశం క్లెయిం చెల్లింపుల చరిత్ర (క్లెయిమ్ సెటిల్మెంట్ రేషియో). ఎంత మంచి పాలసీ అయినా, క్లెయిమ్ల విషయంలో లేనిపోని ఇబ్బందులు పెడితే అంతిమంగా వచ్చే ఫలితం ఏమీ ఉండదు. పైగా మానసిక ఆందోళన పెరుగుతుంది కూడా. కాబట్టి, చిన్న చిన్న కారణాలతో క్లెయిమ్లను నిరాకరించే సంస్థలు అందించే పాలసీలకు దూరంగా ఉండటమే మంచిది. మీకు సరిపోయే పాలసీని, మంచి చెల్లింపుల చరిత్ర ఉన్న సంస్థ నుంచి తీసుకున్నప్పుడే ఆపదలో మిమ్మల్ని ఆదుకుంటుంది.
రహస్యాలు దాచకండి: వైద్యుడి దగ్గరకు వెళ్లినప్పుడు మన ఆరోగ్యానికి సంబంధించిన చిన్న విషయాన్ని కూడా దాచిపెట్టకూడదు అంటారు. ఆరోగ్య బీమా పాలసీకీ ఇది వర్తిస్తుంది. మన ఆరోగ్యానికి సంబంధించిన అన్ని విషయాలనూ ప్రతిపాదిత పత్రంలో పేర్కొనడం ఎప్పుడూ మంచిది. చాలామంది చేసే పొరపాటేమిటంటే.. ఆరోగ్యానికి సంబంధించిన అన్ని వివరాలూ చెబితే పాలసీ రాదేమో అని అపోహ పడుతుంటారు. బీమా సంస్థకు అన్ని వివరాలూ తెలియజేయాల్సిన నైతిక బాధ్యత పాలసీదారులదే. తెలియజేయకపోతే మోసపూరితంగా పాలసీ పొందినట్లు అవుతుంది. ఇలా చేయడం వల్ల క్లెయిమ్ నిరాకరించే అవకాశం లేకపోలేదు. పాలసీ తీసుకునేటప్పుడు మీకు సంబంధించిన వివరాలన్నీ తెలియజేయడంతోపాటు, అవసరమైతే ఆరోగ్య పరీక్షలు చేయించుకోండి. అప్పుడే మున్ముందు వచ్చే ఇబ్బందులను తప్పించుకోవచ్చు.
క్లెయిమ్ ప్రాసెస్ సులభంగా: క్లెయిమ్ ప్రాసెస్ వేరు వేరు బీమా సంస్థలకు వేరు వేరుగా ఉంటుంది. అందువల్ల పాలసీ కొనుగోలు చేసేముందు క్లెయిమ్ ప్రాసెస్ను తెలుసుకోవాలి. సులభంగా ప్రాసెస్ పూర్తయ్యేలా ఉండాలి. ఇందుకోసం ఆన్లైన్లో పాలసీ తీసుకున్న పాలసీదార్లు ఇచ్చిన రివ్యూలను చదవడం ద్వారా కూడా బీమా సంస్థ మెరుగైన సేవలను అందిస్తుందా లేదా తెలుసుకోవచ్చు.
చివరిగా: పాలసీని తీసుకునేటప్పుడు ప్రీమియం ఒక్కటే కొలమానం కాదు. ఆసుపత్రిలో చేరినప్పుడు వైద్య ఖర్చులతో పాటు అనేక ఇతర ఖర్చులూ ఉంటాయి. కాస్త అధిక ప్రీమియం ఉన్నప్పటికీ పూర్తి పరిహారాన్ని ఇచ్చే పాలసీని తీసుకోవడమే ఎప్పుడూ ఉత్తమం.
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
-
ఆరోగ్య బీమా.. ఏ వయసులోనైతే మేలు..?
ఒక వ్యక్తి యుక్త వయసులోనే ఆరోగ్య బీమా పాలసీ తీసుకోవడం వల్ల ప్రీమియం తగ్గింపు సహా అనేక ప్రయోజనాలుంటాయి. అవేంటో తెలుసుకోండి.. -
ఆరోగ్య బీమా అందరికీ అందేలా...
అందరికీ బీమా పాలసీలను అందించాలనే లక్ష్యంతో ఉన్న భారతీయ బీమా నియంత్రణ, అభివృద్ధి ప్రాధికార సంస్థ (ఐఆర్డీఏఐ) ఆరోగ్య బీమా పాలసీ నిబంధనల్లో కీలక మార్పులు తీసుకొచ్చింది. -
మ్యూచువల్ ఫండ్లు..కేవైసీని పూర్తి చేశారా?
ఆర్థిక లక్ష్యాలను సాధించే క్రమంలో పెట్టుబడులు ఎంతో కీలకం. దీర్ఘకాలంలో సంపదను సృష్టించేందుకూ ఇవి అవసరం. చాలామంది మ్యూచువల్ ఫండ్లను ఇందుకు సరైన మార్గంగా నమ్ముతున్నారు. -
పన్ను విధానం ఎంచుకుందామిలా...
ITR: గత ఆర్థిక సంవత్సరంలో ఆర్జించిన ఆదాయానికి పన్ను రిటర్నులు దాఖలు చేసేందుకు తరుణం వచ్చేసింది. ఈ నేపథ్యంలో పన్ను చెల్లింపుదారులు కొత్త, పాత పన్ను విధానంలో దేన్ని ఎంచుకోవాలన్న సందేహంలో ఉన్నారు. -
క్రెడిట్ స్కోరు పెరగాలంటే
బ్యాంకులు, ఆర్థిక సంస్థలు ఒక వ్యక్తికి రుణాన్ని ఇచ్చేటప్పుడు ముఖ్యంగా పరిశీలించేది క్రెడిట్ స్కోరు. రుణగ్రహీత చరిత్ర, అతని అర్హతను తెలుసుకునేందుకూ ఇది ఉపయోగపడుతుంది. -
Mutual Funds: స్మాల్ క్యాప్ ఫండ్లపై రాబడులివే
స్మాల్ క్యాప్ ఫండ్లలో రిస్క్ ఉన్నప్పటికీ, దీర్ఘకాలంలో గణనీయమైన రాబడిని అందించగల సామర్థ్యాన్ని కలిగి ఉన్నాయి. ఈ ఫండ్లలో మంచి ఫలితాలను అందించిన కొన్నింటిని ఇక్కడ చూడొచ్చు. -
సెకండ్ హ్యాండ్ లగ్జరీ కారు కొనుగోలు ప్రయోజనమేనా?
నాన్ లగ్జరీ కారు కొనుగోలు కంటే కొద్దిగా ఎక్కువ ఖర్చు చేస్తే అధునాతన ఫీచర్లు గల సెకండ్ హ్యాండ్ లగ్జరీ కారు కొనుగోలు చేయొచ్చు. ఇలాంటి కార్ల కొనుగోలుతో ప్రయోజనాలు ఏమైనా ఉన్నాయా అనేది చూద్దాం. -
జీవిత బీమాలో క్లెయిం సెటిల్మెంట్ ఎలా?
జీవిత బీమా క్లెయిమ్స్ సెటిల్మెంట్ అనేది బీమా సంస్థకు సంబంధించిన ముఖ్యమైన సేవల్లో కీలకమైనది. క్లెయిం సెటిల్మెంట్స్ గురించి ఇప్పుడు తెలుసుకుందాం. -
ఆరోగ్య బీమా కొనుగోలుకు వయో పరిమితి తొలగింపు
ఆరోగ్య బీమా కొనుగోలుకు ఉన్న వయో పరిమితిని ఐఆర్డీఏ తొలగించింది. దీంతో అన్ని వయసుల వారూ బీమా పాలసీని తీసుకునే అవకాశం లభించనుంది. -
ఆదాయపు పన్ను రిటర్నులు ఎప్పుడంటే...
ఆదాయపు పన్ను రిటర్నులు దాఖలు చేసేందుకు వీలుగా సంబంధిత ఐటీఆర్లను ఐటీ శాఖ అందుబాటులోకి తీసుకొచ్చింది. ఇప్పటికే పన్ను చెల్లింపుదారులకు 2023-24 ఆర్థిక సంవత్సరంలో (2024-25 మదింపు సంవత్సరం) మూలం వద్ద పన్ను కోత (టీడీఎస్)కు సంబంధించిన వివరాలను సంక్షిప్త సందేశాల రూపంలో పంపిస్తూ ఉంది -
ఆరోగ్య బీమా ప్రీమియం భారం కాకుండా
ఆర్థిక ప్రణాళికలో ఆరోగ్య బీమా పాలసీ ఎంతో కీలకంగా మారింది. ఊహించని వైద్య ఖర్చులను తట్టుకునేందుకు పూర్తి స్థాయి ఆరోగ్య బీమా పాలసీ అనివార్యం అవుతోంది. -
ఉన్నత చదువులకు భరోసానిద్దాం...
పిల్లల చదువుల ఖర్చులు ఏటా 7-10 శాతం పెరుగుతున్నాయి. మరోవైపు క్షీణిస్తున్న రూపాయి విలువ దీనికి అదనం. ఒకప్పటితో పోలిస్తే పిల్లల ఉన్నత చదువుల ప్రణాళిక ఇప్పుడు క్లిష్టంగా మారింది. -
వెండిలో పెట్టుబడి లాభమేనా?
బంగారం, వెండి.. ఈ రెండు లోహాలతో భారతీయులకు విడదీయలేని సంబంధం ఉంది. ఆభరణాలు, వస్తువుల రూపంలో వీటిని కొనుగోలు చేసేందుకు అందరూ ఆసక్తి చూపిస్తారు -
సరైన బీమా హామీ మొత్తాన్ని ఎలా ఎంచుకోవాలి?
ప్రస్తుత కాలంలో సంపాదించే ప్రతి వ్యక్తికి, ముఖ్యంగా తనపై ఆధారపడిన వారు ఉన్నప్పుడు తగిన జీవిత బీమా మొత్తం ఉండడం ఎంతో అవసరం. ఎంత బీమా ఉంటే కుటుంబ సభ్యులకు సరిపోవచ్చో ఇక్కడ చూడండి. -
ఆరోగ్య బీమా రూల్స్లో మార్పులు.. పాలసీదారులకు ప్రయోజనం
IRDAI : ఆరోగ్య బీమా పాలసీల నిబంధనల విషయంలో బీమా నియంత్రణ, అభివృద్ధి ప్రాధికార సంస్థ కొత్త నిబంధనలు తీసుకొచ్చింది. వీటి ద్వారా బీమా కస్టమర్లకు మరింత ప్రయోజనం చేకూరనుంది. -
మిడ్ క్యాప్ ఫండ్లపై రాబడులు ఎంతెంత?
దేశీయంగా పెట్టుబడులకు వివిధ మ్యూచువల్ ఫండ్ల పథకాలు ఉన్నాయి. ఈ మ్యూచువల్ ఫండ్లలో మంచి ఫలితాలను అందించిన కొన్ని మిడ్ క్యాప్ ఫండ్లను ఇక్కడ చూడొచ్చు. -
కొత్త ఏడాదిలో పన్ను విధానం ఎంచుకుంటున్నారా? ఇవి తెలుసుకున్నాకే..!
Income tax: కొత్త ఆర్థిక సంవత్సరంలో వేతన జీవులు పన్ను విధానం యాజమాన్యానికి తెలియజేయాలి. టీడీఎస్ కోసం మీకు నప్పే పన్ను విధానం ఎంచుకోవడం మంచిది. -
పదవీ విరమణ తర్వాత రూ.1 కోటి నిధి సరిపోతుందా?
చాలా మంది పదవీ విరమణ నిధికి రూ.1 కోటి సరిపోతుందని అనుకుంటారు. ఎలాంటి విషయాలు పదవీ విరమణ నిధిని, రాబడిని ప్రభావితం చేస్తాయి. రూ.1 కోటి నిధి సరిపోతుందా? లేదా? ఇక్కడ తెలుసుకోండి.. -
జీవిత బీమా.. అనుబంధ పాలసీలు తీసుకున్నారా?
ఊహించని పరిస్థితుల నుంచి మీ కుటుంబ ఆర్థిక భవిష్యత్తుకు రక్షణ కల్పించేది జీవిత బీమా. సంపాదించే ప్రతి ఒక్కరూ తన ఆర్థిక ప్రణాళికల్లో దీనికి తగిన స్థానం ఇవ్వాల్సిందే. ఆయుర్దాయం పెరుగుతోంది. అదే సమయంలో జీవన శైలీ మారుతోంది. -
లక్ష్య సాధనకు సిప్ మార్గం
స్టాక్ మార్కెట్లో చిన్న మొత్తాలతోనూ మదుపు చేసేందుకు క్రమానుగత పెట్టుబడి విధానం (సిప్) తోడ్పడుతుంది. గతంతో పోలిస్తే ఇప్పుడు సిప్ ద్వారా మదుపు చేసే వారు పెరిగారు. యాంఫీ గణాంకాల ప్రకారం చూస్తే.. గత నెలలో దాదాపు 42.87 లక్షల కొత్త సిప్ ఖాతాలు ప్రారంభమయ్యాయి. -
విహార యాత్రలో ధీమాగా
వేసవి సెలవులు వచ్చేశాయి. ఈ కాలంలో చల్లని ప్రాంతాలకు వెళ్లేందుకు చాలామంది ఆసక్తి చూపిస్తుంటారు. ఇందులో చాలామంది విదేశాలకు వెళ్లేవారూ ఉంటారు. ఈ నేపథ్యంలో విదేశీ ప్రయాణాల్లో అనుకోని అవాంతరాలు, అనారోగ్యం వచ్చినప్పుడు తోడుండేలా బీమా తీసుకోవడం మంచిది.