అనుమతుల్లేకుండా.. విద్యుత్తు ఆటోల అమ్మకాలు!

గూడ్స్‌ బండ్ల పేరుతో విక్రయం

ఈనాడు, హైదరాబాద్‌: విద్యుత్తు వాహనాలకు కేంద్ర, రాష్ట్ర ప్రభుత్వాలు కల్పిస్తున్న ప్రత్యేక సౌకర్యాలు, అనుమతులను నగరంలో కొందరు వాహనాల డీలర్లు సొంత లాభాలకు వినియోగించుకుంటున్నారు. ఈ-ఆటోలు విక్రయించేందుకు రవాణాశాఖ అనుమతులు తీసుకోవాల్సి ఉంది. గూడ్స్‌ ఆటోలు విక్రయించేందుకు అనుమతి తీసుకోవాల్సిన అవసరం లేదన్న నిబంధనల సాకుతో గూడ్సు వాహనాల తరహలోనే ప్యాసింజర్‌ ఆటోలను విక్రయిస్తున్నారు. కొద్దినెలల నుంచి   మహీంద్ర, పియా జియో, ఈ-రిషాలతోపాటు మరికొన్ని కంపెనీలు విద్యుత్తు ఆటోలను విక్రయిస్తున్నాయి. కాలుష్య రహితం, శబ్దం లేకుండా రహదారులపై వెళ్తుండడం, ఎల్‌పీజీ ధర పెరుగుతుండడం వంటి కారణాలతో ఆటోడ్రైవర్లు ఈ-ఆటోలను కొనేందుకు ఆసక్తి ప్రదర్శిస్తున్నారు. కొద్దిరోజుల నుంచి ఈ-ప్యాసింజర్‌ ఆటోలు రిజిస్ట్రేషన్‌కు వస్తుండంతో రవాణాశాఖ అధికారులు వీటిపై దృష్టి కేంద్రీకరించారు. అనుమతులు లేకుండా ఈ-ఆటోలు విక్రయిస్తే కఠిన చర్యలు చేపడతామంటూ హెచ్చరించారు.

ఆన్‌లైన్‌లో దరఖాస్తు అవసరం
నగరంలో గూడ్స్‌ ఆటోలు వందల్లోనే ఉన్నాయి. రవాణాశాఖ నుంచి అనుమతి(లైసెన్స్‌) లేకుండా నగరంలో కొందరు డీలర్లు ప్యాసింజర్‌ ఆటోలను విక్రయిస్తున్నారు. ఈ-ప్యాసింజర్‌ ఆటోను కొనాలంటే ముందుగా రవాణాశాఖ అనుమతి పొందాలి. ఆన్‌లైన్‌ ద్వారా దరఖాస్తు చేసుకుంటే రవాణాశాఖ అధికారులు దరఖాస్తుదారుడి వివరాలు, లైసెన్సును పరిశీలించి ఆటోను కొనేందుకు అనుమతులిస్తారు. ఆటోను కొన్నాక అనుమతి పత్రంతో రవాణాశాఖ అధికారులను సంప్రదిస్తే ఈ-ఆటోకు రిజిస్ట్రేషన్‌ చేయడంతోపాటు ప్రత్యేక నంబర్‌ ప్లేట్‌ను కేటాయిస్తారు.

నిషేధం ఉన్నందుకే..  హైదరాబాద్‌లో డీజిల్‌, పెట్రోల్‌, ఎల్‌పీజీ కొత్త ఆటోలపై ప్రభుత్వం కొన్నేళ్ల క్రితం నిషేధం విధించింది. ఆటోల ద్వారా కాలుష్యం పెరిగిపోతోందన్న కారణంతో ప్రభుత్వం ఈ నిర్ణయం తీసుకుంది. అందుకే కొందరు డీలర్లు రవాణా శాఖ దృష్టి పడకుండా ఈ-గూడ్స్‌ ఆటోల పేరుతో అమ్మేస్తున్నారు.