ఆమె కథ విని.. కలిసేందుకు ఇంటికెళ్లి

అభిమాని ఇంట్లో ‘ది ఫ్యామిలీ స్టార్‌‘ బృందం సందడి

జీడిమెట్ల, న్యూస్‌టుడే: ఓ అభిమాని కథ విన్నారు.. ఆమెను ఎలాగైనా  కలవాలని ఇంటికెళ్లి అందరిని ఆశ్చర్యపరిచారు యువ కథానాయకుడు విజయ్‌ దేవరకొండ. ఈ నెల 2న జూబ్లీహిల్స్‌లో ది ఫ్యామిలీ స్టార్‌ బృందం మీమర్స్‌తో ఓ సమావేశాన్ని నిర్వహించింది. వారితో ఒక్కొక్కరిని పరిచయం చేసుకొని ఇంట్లో మీ ఫ్యామిలీ స్టార్‌ ఎవరంటూ ప్రముఖ నిర్మాత దిల్‌రాజు అడిగారు. కుత్బుల్లాపూర్‌ నియోజకవర్గం సూరారం కాలనీ సుందర్‌నగర్‌కి చెందిన ప్రశాంత్‌ తన జీవితంలో జరిగిన విషయాల్ని పంచుకున్నాడు. ‘మా ఇంట్లో ఫ్యామిలీ స్టార్‌ నా చెల్లి స్వరూప. పుట్టుకతో దివ్యాంగురాలు. అయినా ఏమాత్రం కుంగిపోలేదు. డిగ్రీ పూర్తి చేసింది. కొవిడ్‌ సమయంలో ఖాళీగా ఉండొద్దని ఓ కిరాణా కొట్టును ఏర్పాటు చేసుకొని కుటుంబానికి ఆర్థికంగా అండగా నిలిచింది. ఇప్పుడు అమెజాన్‌ సంస్థలో ఉద్యోగం చేస్తోంది’ అని చెప్పారు. అతని మాటలు విన్న దిల్‌రాజు భావోద్వేగానికి గురయ్యారు. తన బృందంతో త్వరలోనే ఇంటికి వస్తానని చెప్పారు. మంగళవారం నటుడు విజయ్‌ దేవరకొండ, డైరెక్టర్‌ పరశురాంతో కలిసి వారి ఇంటికి వెళ్లారు. వారితో మాట్లాడి యోగక్షేమాలు తెలుసుకున్నారు.