Miss Shetty Mr Polishetty: ‘మిస్‌ శెట్టి.. మిస్టర్‌ పొలిశెట్టి’లో బాలకృష్ణ..?

హైదరాబాద్‌: అగ్ర కథానాయిక అనుష్క శెట్టి (Anushka Shetty).. యువ నటుడు నవీన్‌ పొలిశెట్టి (Naveen Polishetty) ప్రధాన పాత్రల్లో నటించిన చిత్రం ‘మిస్‌ శెట్టి.. మిస్టర్‌ పొలిశెట్టి’ (Miss Shetty Mr Polishetty). మహేశ్‌బాబు అనే యువ దర్శకుడు ఈ చిత్రాన్ని తెరకెక్కించారు. కొత్తతరం ప్రేమ, ఫ్యామిలీ ఎంటర్‌టైనర్‌గా సిద్ధమైన ఈ సినిమా గురువారం ప్రేక్షకుల ముందుకు వచ్చింది. అనుష్క - నవీన్‌ జోడీ, కామెడీ టైమింగ్‌, ఎమోషన్స్‌.. ఇలా సినిమా తమకెంతో నచ్చిందంటూ సినీ ప్రియులు వరుస ట్వీట్స్‌ చేస్తున్నారు.

Jawan Movie Review | రివ్యూ: జవాన్‌.. షారుక్‌, నయనతార యాక్షన్‌ థ్రిల్లర్‌ ఎలా ఉందంటే?

ఇదిలా ఉండగా, ఈ సినిమాలోని పలు సన్నివేశాల్లో నటుడు బాలకృష్ణ కనిపించడం ప్రేక్షకులను ఆకట్టుకుంటోంది. అయితే, ఆయన అతిథి పాత్రలో నటించలేదు. కానీ, ఇందులో బాలకృష్ణ నటించిన పలు చిత్రాలను రిఫరెన్స్‌గా చూపించారు. అనుష్క - జయసుధలపై చిత్రీకరించిన ఓ సన్నివేశంలో ‘జై బాలయ్య.. జై జై బాలయ్య.. మన బాలయ్య.. ఈస్ట్‌ ఆర్‌ వెస్ట్‌ బాలయ్య ఈజ్‌ ది బెస్ట్‌’ అంటూ జయసుధ చెప్పే స్లోగన్స్‌ థియేటర్స్‌లో ఈలలు వేయిస్తున్నాయి. ఓ సన్నివేశంలో ‘అఖండ’ ఎంట్రీ సీన్స్‌ను చూపించారు. ఇక, ఈ సీన్స్‌ వచ్చినప్పుడు సినీ ప్రియులు సైతం ‘జై బాలయ్య’ అంటూ నినాదాలు చేస్తున్నారని నెటిజన్లు ట్వీట్స్‌ చేస్తున్నారు.

‘నిశ్శబ్దం’ తర్వాత అనుష్క నటించిన చిత్రమిది. ఇందులో ఆమె చెఫ్‌ పాత్రలో కనిపించారు. మరోవైపు, ‘జాతిరత్నాలు’ తర్వాత నవీన్‌ పొలిశెట్టి ఈ సినిమాలోనే నటించారు.