Keerthy Suresh: హైదరాబాద్‌లో కీర్తిసురేశ్‌.. మాస్క్‌ వేసుకుని టిఫిన్‌ సెంటర్‌కు వెళ్లిన బ్యూటీ

హైదరాబాద్‌: తన తదుపరి చిత్రం ‘భోళా శంకర్‌’ (Bhola Shankar) చిత్రీకరణలో బిజీగా పాల్గొంటున్నారు నటి కీర్తిసురేశ్‌ (Keerthy Suresh). మెహర్‌ రమేశ్‌ తెరకెక్కిస్తోన్న ఈ చిత్రంలో ఆమె చిరంజీవికి సోదరిగా కనిపించనున్నారు. తాజాగా ఈ సినిమా చిత్రీకరణ హైదరాబాద్‌లో జరిగింది. ఈ నేపథ్యంలోనే నగరానికి వచ్చిన కీర్తిసురేశ్‌ షూట్‌ పూర్తైన వెంటనే సరదాగా కాసేపు సిటీలో చక్కర్లు కొట్టారు. తన టీమ్‌తో కలిసి.. గచ్చిబౌలిలోని వరలక్ష్మి టిఫిన్‌ సెంటర్‌కు వెళ్లారు. అందరితో కలిసి అక్కడ టిఫిన్‌ చేసి.. అనంతరం తనకెంతో ఇష్టమైన తందూరీ టీ తాగారు. దీనికి సంబంధించిన ఫొటోలను ఆమె ఇన్‌స్టా వేదికగా షేర్‌ చేశారు. ఈ వీకెండ్‌ తనకెంతో చక్కగా గడిచిందని ఆమె పేర్కొన్నారు. అయితే, బయటవాళ్లెవరూ తనకు గుర్తు పట్టకుండా ఉండేందుకు ఆమె మాస్క్‌ ధరించారు. కీర్తిసురేశ్‌ షేర్‌ చేసిన ఫొటోలు ప్రస్తుతం నెట్టింట చక్కర్లు కొడుతున్నాయి.

‘భోళా శంకర్‌’ విషయానికి వస్తే.. తమిళంలో సూపర్‌హిట్‌ అందుకున్న ‘వేదాళం’కు రీమేక్‌గా ఇది తెరకెక్కుతోంది. మెహర్‌ రమేశ్‌ దర్శకుడు. సోదరి సెంటిమెంట్‌ నేపథ్యంలో రానున్న ఈ సినిమాలో చిరంజీవి-కీర్తిసురేశ్‌ అన్నాచెల్లెలుగా కనిపించనున్నారు. తమన్నా కథానాయిక. ఏకే ఎంటర్‌టైన్‌మెంట్స్‌ పతాకంపై ఇది నిర్మితమవుతోంది. సంగీత్‌కు సంబంధించిన ఓ పాట చిత్రీకరణ తాజాగా హైదరాబాద్‌లో జరిగింది.