Tillu2: ‘టిల్లు స్వ్కేర్‌’ కొత్త రిలీజ్‌ డేట్‌ ఇదే..

ఇంటర్నెట్ డెస్క్‌: ‘డీజే టిల్లు’ (DJ Tillu).. అంటూ గతేడాది సందడి చేశాడు సిద్ధు జొన్నలగడ్డ (Siddu Jonnalagadda). అంచనాలకు మించి విజయం సాధించిన ఆ చిత్రం మంచి వసూళ్లనూ సొంతం చేసుకుంది. ఈ సినిమాకు సీక్వెల్‌ తీస్తున్న విషయం తెలిసిందే. తాజాగా దాని కొత్త రిలీజ్‌ డేట్‌ను నిర్మాణ సంస్థ  ప్రకటించింది.

సిద్ధు జొన్నలగడ్డ (Siddhu Jonnalagadda) హీరోగా  తెరకెక్కుతోన్న ఈ సీక్వెల్‌ను గతేడాది దీపావళికి ప్రకటించారు. అప్పటి నుంచి ఏదో ఒక అప్‌డేట్‌తో సందడి చేస్తూనే ఉన్నారు. ఇక ఈ చిత్రం 2024 ఫిబ్రవరి 9న ప్రపంచవ్యాప్తంగా ప్రేక్షకుల ముందుకు రానుంది. ఈ విషయాన్ని తెలుపుతూ నిర్మాత పోస్ట్‌ పెట్టారు. ‘మరోసారి నవ్వులు పూయిస్తూ చరిత్ర సృష్టించడానికి ‘టిల్లు స్వ్కేర్‌’ (Tillu Square) వచ్చేస్తున్నాడు. మొదటి పార్ట్‌ను మించి వినోదాన్ని పంచనున్నాడు. ఈసారి ఫ్యామిలీ ఆడియన్స్‌తోపాటు మాస్‌ ప్రేక్షకులను కూడా ఆకట్టుకోనున్నాడు’ అని తెలిపారు. మొదట ఈ చిత్రాన్ని ఈ ఏడాది సెప్టెంబర్‌ 15న విడుదల చేయాలని భావించారు. అయితే చిత్రీకరణ పూర్తి కాకపోవడంతో వచ్చే ఏడాదికి వాయిదా వేశారు.

ఓటీటీలోకి ‘పెదకాపు’.. స్ట్రీమింగ్‌ ఎక్కడంటే!

రామ్‌ మల్లిక్‌ దర్శకత్వంలో రానున్న ఈ సినిమాలో ఈ యంగ్‌ హీరో సరసన కేరళ బ్యూటీ అనుపమ పరమేశ్వరన్ (Anupama Parameswaran) కథానాయికగా నటిస్తోంది. ఫస్ట్‌ పార్ట్‌లో రాధిక పాత్ర ప్రేక్షకులను ఎంతో ఆకట్టుకుంది. సూర్యదేవర నాగ వంశీ నిర్మిస్తున్న ఈ సినిమాకు రామ్ మిరియాల, శ్రీచరణ్ పాకాల సంగీతం అందిస్తున్నారు. ఇక దీనితో పాటు నీరజ కోన దర్శకత్వంలో  సిద్ధు జొన్నలగడ్డ ఓ సినిమాలో నటిస్తున్నారు. ఇందులో రాశీఖన్నా, శ్రీనిధి శెట్టి నటిస్తున్నారు. ఇటీవలే దీని షూటింగ్‌ కూడా ప్రారంభమైంది. అలాగే నందినిరెడ్డి దర్శకత్వంలోనూ ఓ సినిమా చేయనున్నారు.