‘ఆ వార్తలు అవాస్తవం’: అమెరికా దర్యాప్తు చేపట్టిందన్న కథనంపై అదానీ గ్రూప్‌ స్పందన

ముంబయి: లంచం ఆరోపణల విషయంలో అమెరికా(USA) ప్రభుత్వం దర్యాప్తు చేపట్టిందన్న వార్తలపై అదానీ గ్రూప్‌(Adani Group) స్పందించింది. ఆ మీడియా కథనం అవాస్తవమని వెల్లడించింది. ‘ఆ ఆరోపణలకు సంబంధించి అమెరికా న్యాయశాఖ నుంచి ఎలాంటి నోటీసు అందలేదు’ అని సంస్థ తన ఫైలింగ్‌లో తెలిపింది. ఈ దర్యాప్తు గురించి తమకు తెలియదని, భారత్‌తో సహా ఇతర దేశాల్లోని అవినీతి నిరోధక చట్టాలకు తాము కట్టుబడి ఉన్నామని గ్రూప్‌ పేర్కొంది.

భారత్‌లో ఎనర్జీ ప్రాజెక్టుల ఏర్పాటు విషయంలో అనుకూలంగా వ్యవహరించేలా అదానీ గ్రూప్‌ లేదా ఆ సంస్థలోని వ్యక్తులు ఎవరైనా లంచం ఇవ్వజూపారా? లేదా? అనేది తెలుసుకోవడానికి అమెరికా దర్యాప్తు చేపట్టిందని బ్లూమ్‌బెర్గ్‌ కథనంలో పేర్కొంది. ఆ దేశ అటార్నీ జనరల్‌ ఆఫీస్‌, జస్టిస్‌ డిపార్ట్‌మెంట్‌కు చెందిన ఫ్రాడ్‌ యూనిట్‌ ఈ విచారణ జరపుతున్నట్లు తెలిపింది. దేశీయ ఎనర్జీ కంపెనీ అజ్యూర్‌ పవర్‌ గ్లోబల్‌పైనా దృష్టిపెట్టినట్లు వెల్లడించింది. అమెరికాలో అదానీ గ్రూప్‌ ట్రేడ్‌ కానప్పటికీ.. అమెరికన్ల పెట్టుబడులు దానిలో ఉన్న నేపథ్యంలో అక్కడి సంస్థలు దర్యాప్తు జరిపేందుకు వీలుంది.